«Қайрат» ойыншысы ауыр дертке шалдықты

Футзалдан «Қайрат» командасының және Бразилия ұлттық құрамасының қорғаушысы Нето мидың қатерлі ісігіне шалдықты. Бұл туралы sports.kz хабарлады. Бұған дейін алматылық команда футболшының жарақатына байланысты Бразилия мен Каталония құрамаларының арасындағы жолдастық кездесуге қатыспайтынын ресми мәлімдеген. Кейінірек SporTV комментаторы Марсело Родригес өзінің блогына қорғаушының ауыр дертке шалдыққанын жазған. «Екі апта бұрын «Қайратта» жаттығу жасап жүргенімде өзімді жайсыз сезіндім. Тексеруден өткенімнен кейін миымда ісік бары анықталды. Бразилияға келгенімнен кейін қайтадан анализ тапсырдым. Мұнда да сол диагнозды қайталады. Ертең ота жасатамын. Мен үшін Құдайдан дұға жасап, тілеуімді тілесеңіздер алғысым шексіз болар еді», – деді Нето. «Қайрат» ойыншысына бүгін туған қаласы Уберландияда ота жасалады.