Жауынгердің денесі 73 жылдан кейін жеткізілді

Эстониялық «Front Line» іздестіру тобының жетекшісі Андрей Лазуриннің айтуынша, Таненберг шекарасында Ленинград майданының жауынгерлері жауға қарсы 9 ай бойы шайқасыпты. Қызыләскер Николай Сорокин осы жерде Эстонияны неміс-фашист басқыншыларынан азат ету барысында ерлікпен қаза тапқан. – Біз 14 жыл бойы іздестіру жұмыстарымен айналысып келеміз, – деді Андрей Лазурин, – осы уақыт ішінде белгісіз 958 жауынгерді тауып, анық­тап, қайта жерлеу рәсіміне қатыстық. Бірақ, Қазақстанға бірінші рет келіп тұрмыз. Се­мей қаласын алғашқы рет көруіміз. Енді міне, Эстония-Ресей-Қазақстан халықаралық жобасымен жұмыс істеуді бастадық. Осы жоба арылы Семейге Сорокиннің мүрдесін жеткізуге ресейлік бір меценат көмектесті. – Соғыста ерлікпен қаза тапқан Николай Сорокиннің денесін Қазақстан елшісі арқылы туған жеріне 73 жылдан кейін жеткізуге мүмкіндік туды, – дейді Семей қалалық ішкі саясат бөлімінің маманы Мейіржан Амангелді. Беймәлім жауынгердің дерегі қал­тасындағы №811663 «Ерлігі үшін» медалі арқылы анықталған. Іздестірушілер Ресей Қорғаныс министрлігіне хат жазып, медаль иесін сұрағанда, бұл 124-інші атқыштар дивизиясы 781 полкінің қатардағы жауынгері, 1912 жылы туған Николай Федорович Соро­киндікі деген анықтама жібер­ген. Ол Семейдің Октябрь аудан­­дық әскери комиссариа­ты ар­қылы 1941 жылы 23 тамызда әс­кер қатарына шақырылған екен. – Әкемізді майданға әкет­кенде небәрі бір жаста болдым, ал әпкем үш жарым жас­та еді, – деп әңгімелейді май­дангердің кіші қызы Галина Мурашкина. – Анамның айтуынша, ол кеме жасау зауытында, шаруашылықта жұмыс істеген. Әкеміз соғыста із-түзсіз кетті деген қағазды ал­сақ та, сенбей өмір бойы ізде­­дік. Тек 73 жылдан кейін ғана дерегін таптық. Раушан НҰҒМАНБЕКОВА, журналист СЕМЕЙ