Универсиада-2017. Қазақстан ерлер құрамасы шорт-тректен қола жүлде алды

Алматыда өтіп жатқан қысқы Универсиада ойындарында шорт-тректен Қазақстанның ерлер құрамасы 5000 метрлік эстафета сайысында қола жүлде жеңіп алды. Бұл жарыста Ресей, Қытай, Оңтүстік Корея және Қазақстан құрамасы сынға түскен болатын. Бір айта кетерлігі жеңімпаздар бейнеқайталау арқылы ғана анықталды. Осы арқылы оңтүстіккореялықтардың ереже бұзғаны белгілі болды. Нәтижесінде алтын жүлде Қытай құрамасына бұйырса, күмісті Ресей спортшылары еншіледі. Ал үздік үштікті Қазақстан спортшылары түйіндеді. Бұл бәсекеде еліміздің намысын Абзал Әжіғалиев, Айдар Бекжанов, Денис Никиша, Нұртілек Қажғалиев және Нұрберген Жұмағазиев қорғады.