Допингке ұшыраған спортшылардан пәтерлер қайтарылмайды

Допинг дауына ұрынған Олимпиада жүлдегерлерінен пәтерлер қайтарып алынбайды. Бұл туралы Мәдениет және спорт вице-министрі Сәкен Мұсайбеков мәлімдеді. «WADA (Дүниежүзілік допингке қарсы агенттік) кодексінде тыйым салынған препараттарды пайдаланған адам мемлекеттік қаржыландырудан, халықаралық және жергілікті федерациялардың қаржыландыруынан толықтай айырылатындығы жазылған. Ол қарайтын халықаралық федерацияға біліктілігінен айыру енгізіледі. Ал жүлдеге берілген пәтерлер спортшылардан қайтарылмайды. Бұл туралы ешқандай заңнамалық негіз жоқ. 2008, 2012 жылдары жеңістеріне қуанғанымыздай, қиын уақытта қолдау білдірейік», – деді Мұсайбеков Бұдан бөлек, ол Рио Олимпиадасының жеңімпаздарына берілетін сыйақы мен пәтерлерге қатысты тілшілердің сауалына жауап берді. «Олимпиада ойындарына қатысушылардың жүлдесіне қатысты айтар болсам, олимпиадашылар сыйақыларын алса, келесі аптаның соңына дейін паралимпиадашылар алады. «Дене тәрбиесі және спорт туралы» Заңға сәйкес мемлекеттен пәтер алуы тиісті Олимпиада жүлдегерлеріне жүлделерін табыстауға бізде жарты жыл уақыт бар», – деді вице-министр.