Кассациялық тәртіппен сот актісінің заңдылығын тексеру барысында жымқырылған қаражаттың 127 млн теңге сомасы басқа заңды тұлғаның банк шоттарынан анықталды. Прокурордың кассациялық наразылығы бойынша сот актілері өзгертіліп, көрсетілген қаражат мемлекет кірісіне өндірілді.
Іс Алматыдағы «Сарыарқа» және «Достық» метро станцияларын салу кезінде қаражат жымқыруға байланысты. 2024 жылдың маусымында Алмалы аудандық соты 10 айыпталушыға – «Метрополитен» КМК, «Алматыметроқұрылыс» АҚ және «Автоматизация және Технологиялар Сервис» ЖШС басшыларына қатысты үкім шығарған еді.
Бас көлік прокуратурасының дерегінше, 2018 жылдың маусымынан 2020 жылдың тамызына дейін схемаға қатысушылар қаражатты жалған фирмалар арқылы шығарып отырған. Жалпы келтірілген шығын 5 млрд теңге деп бағаланған.
Негізгі айыпталушылар 7 жылдан 8 жылға дейін бас бостандығынан айырылды. Сондай-ақ сот 1 млрд теңгеден астам сомадағы тыйым салынған мүлікті тәркілеуді және келтірілген шығынды ортақ тәртіпте өндіруді міндеттеген.
Іле Алатауының тау бөктеріндегі жер телімі мемлекетке қайтарылды
«Сарыарқа» метро станциясы 2022 жылдың мамырында «Достық» станциясымен бірге ашылған. Кейін «Достық» станциясы «Бауыржан Момышұлы» деп қайта аталды.
