Шымкент қаласындағы №8 гимназияның 6-сынып оқушысы Нұриман Әділхан осы тақырыпты зерттеп көріпті. Сөйтіп Білім және ғылым министірлігі мен «Дарын» республикалық ғылыми практикалық орталығы ұйымдастырған XIV «Зерде» ғылыми жобалар байқауына ұсынған.
«Бұл тақырыпты таңдаған себебім, 2 жыл бұрын «Қалқанқұлақ» атты телехикаяға түскенмін. Студияда көп уақытымды аниматорлардың жанында өткіздім. Қағаз бетіне салынған суреттердің көгілдір экранда көрсету жолдарын көрдім. Ол процесс мені өте қатты қызықтырды. Жобамды тамыз айынан бастап дайындадым. Біз техника дамыған заманда өмір сүріп жатырмыз. Балаларға арналған анимациялық фильмдер жетерлік. Олар отандық және шетелдік болып екіге бөлінеді. Жоба барысында фильмдердің пайдасы мен зиянын, отандық және шетелдік мультфильмдердің айырмашылығы мен ерекшеліктерін зерттеп, шығу тарихы және негізін қалаушыларды топтастырдым. Экранға дейінгі жұмыстар және қазақ тіліндегі туындылардың дұрыс сөйлеуге, тілді үйренуге арналған жолдарын қарастырдым» дейді байқауда «Мультфильмдердің пайдасы мен зияны» жобасымен Бас жүлдеге ие болған Нұриман Нұрланұлы.
Қиял-ғажайыпқа негізделген көп сериялы "Қалқанқұлақ" телехикаясында ақылды Бақбергеннің рөлін сомдаған Нұриман Әділхан келешекте қазақ киносы мен мультипликация өнерін дамытуға үлес қосқысы келеді. Шымкент қаласынан қатысқан 22 оқушы Ақмола облысының Шучье қаласында өткен республикалық байқаудан жүлдемен оралды.
Ғалымжан ЕЛШІБАЙ,
«Egemen Qazaqstan»
Шымкент
