Жиынды әзірлеу және оны өткізу жөніндегі шаралар жоспарының орындалу барысы туралы Ұйымдастыру комитеті жұмыс тобының жетекшісі, Сенат Аппаратының басшысы Мұрат Нұртілеуов баяндады. Жиын бағдарламасында үш: “Өңірлік қауіпсіздік (Ауғанстан, терроризм және есірткі тасымалымен күрес, қарусыздану)”, “Еуразия: жаңа рыноктар және қатерлердің арта түсуі (экономикалық даму, сауда, ресурстарды басқару, еңбек көші-қоны, қоршаған ортаны қорғау саласындағы мәселелер)” және “ЕҚЫҰ-ның адами өлшемдері (діни толеранттылық, саяси даму, адамдар саудасымен күрес, гендерлік теңдік)” сессияларын өткізу қарастырылған.
Трансазиялық парламенттік жиынға әлемдік қоғамдастықтағы елдердің ұлттық парламенттері мен халықаралық ұйымдардан 350-ге жуық делегат келеді деп күтіліп отыр. Ұйымдастыру комитетінің төрағасы Қасым-Жомарт Тоқаев еліміздің ЕҚЫҰ-ға төрағалық етуі аясындағы Трансазиялық парламенттік жиынның Қазақстанда өтуінің саяси зор маңызына отырысқа қатысушылар назарын аударды. “Бұл жиын парламентаралық үнқатысу мен ынтымақтастықты одан әрі кеңейтуге, ЕҚЫҰ-ның басты міндеттерін шешуде парламентшілердің іс-қимылын белсенділендіру мен рөлін арттыруға бағытталады”, – деді Қ.Тоқаев, деп хабарлады Парламент Сенатының баспасөз қызметі.
