Аудандық орталық аурухананың бас дәрігері Жайдар Әйтішевтің айтуынша, өңір бойынша 56 334 адам тіркеуде тұр. Ал шалғай ауылдарда тұратын қараша халықты қолжетімді медициналық қызметпен қамтамасыз ету үшін жылжымалы медициналық кешен ауылдарға жиі шығады.
«Біздің ЖМК ультрадыбысты аппарат, рентген аппараты, гинекологиялық кресло, офтальмоскоп, отоскоп, көз тонометрі, биохимиялық анализатор, электрокардиограф, глюкометр, коагулометр, пульсоксиметрмен жадбықталған. Кестеге сәйкес ауылдарға тіс дәрігері, көз дәрігері, акушер-гинеколог, хирург, терапевт және ультрадыбысты құрылғы мамандары барып тұрады. 2022 жылдың 10 айында ЖМК арқылы медициналық көмекпен 28 081 адам қамтылды, оның ішінде 15 544-і – балалар. Сондай-ақ 8 810 диагностикалық зерттеулер жасалды. Нәтижесінде, 1 418 науқас анықталды. Олардың 125-інің қан айналымы жүйесінде мәселе туындаса, 11 азаматтан қант диабеті анықталған. Қалғаны – басқа аурулар. Жалпы, 163 адам диспансерлік есепке алынды», дейді Ж.Әйтішев.
Бүгінгі таңда жергілікті тұрғындар 30 денсаулық сақтау нысанына қайырыла алады. Ауданның медицина саласында 150 төсектік орталық аурухана, 250 келушіге арналған консультативтік-диагностикалық емхана, отбасылық денсаулық орталығы, 14 отбасылық дәрігерлік амбулатория, сондай-ақ 6 фельдшерлік-акушерлік және 7 медициналық пункт бар.
Ж.Әйтішевтің айтуынша, осы жылы аудандық емдеу мекемелерінің штаты жаңадан 10 дәрігермен толыққан екен. «Дипломмен – ауылға!» мемлекеттік бағдарламасы аясында ауданда 6 жас маман еңбек етуде.
Жамбыл облысы,
Шу ауданы
