Ресейде қазақтың киіз үйіне деген сұраныс артып келеді

АСТАНА. 3 маусым. Ата-бабаларымыздан бізге мұра болып қалған қазақтың қарапайым киіз үйі бүгінде ресейліктердің қызығушылығын арттырып отыр. Бұл туралы «24kz» хабарлады. Айдар Бейсенбаев деген қостанайлық кәсіпкер киіз үй өндірісін қолға алғалы бес жыл болыпты. Тіпті, оның өнімдері Ресей нарығында сатыла бастады. Кәсіпкер Кеден одағы ашылғалы өнімдерін өткізу мәселесі шешімін таба бастаған. Айдар Бейсенбаев: «Кедендік одақтың пайдасы өте зор, өйткені киіз үйлерді экспортқа шығару жеңілірек болды. Қазір бұрынғыдай қағаздарды көп дайындап керегі жоқ. Тұтынушылар керегін өздері алып кетеді. Ресейліктер қазақтың киіз үйін экотуризмді дамыту мақсатында сатып алады. Сырт елге саудаланатын бұйымдардың ұлттық бояуы қанық. Біздің мақсатымыз – бабамыз тұтынған баспананы брендке айналдырып, сұранысты арттыру», – деді. Айдар Бейсенбаевтың басқаруындағы киіз үй жасайтын кәсіпорын қызметкерлері тапсырыс түссе, айына 5-тен 20-ға дейін киіз үй жасауға мүмкіндіктері бар. Бұл этноөнімдердің 20-30 пайызы Ресейге жөнелтіледі. Әсіресе, кедендік кедергілер жойылғалы Ресейдің Челябі, Қорған, Түмен облыстарынан сұраныс көбейген. Жолдыбай Базар. Дереккөз: «24kz». Фото: «24kz».