Минскіде Еуразиялық экономикалық одақтың келешегі мен мүмкіндіктері талқыланды

АСТАНА. 23 маусым. Минскідегі Қазақстан елшілігінде Еуразиялық экономикалық одақтың бүгіні мен келешегі талқыланған ғылыми-тәжірибелік конференция өтті. Бұл туралы «24kz» хабарлады. Конференцияға ғылым мен мәдениет қайраткерлері, экономика сарапшылары және дипломаттар қатысты. Жиында еліміздің Беларусь мемлекетіндегі төтенше және өкілетті елшісі Ерғали Бөлегенов: «Еуразиялық экономикалық одақтың бекерге құрылмағанын, елдің пайдасын көздейтінін оған мүше мемлекеттердің өкілдері әлі-ақ шынайы сезінетін болады», – деді. Ал өз кезегінде Еуразиялық экономикалық комиссияның бәсекелестік және монополияға қарсы реттеу жөніндегі министрі Нұрлан Алдабергенов: «Өткен жылы Ресей мен Беларусь арасында электрондық сауда шекарасы ашылды, оның нәтижелері жаман емес. Бұл үдеріске Қазақстан 2014 жылы қосылды. Сол үшін де бізге электрондық сауда қызметі шарттарын теңестіру қажет», – деді. Конференцияға арнайы қатысқан Қытайдың Беларусь еліндегі төтенше және өкілетті елшісі Цуй Цимин де өз пікірін ортаға салды. Оның айтуынша, Қытай Еуразиялық экономикалық одақпен қарым-қатынасқа түсуден үлкен үміт күтеді. Таяуда Қытай мен Еуразиялық экономикалық одаққа мүше-мемлекеттер арасында ынтымақтастық жөнінде қадам жасалуы мүмкін. Бұдан бөлек, басқосуда Еуразиялық экономикалық одақ аясында еркін сауда айналымының артуына, экономика мен бәсекелестіктің дамуына қол жеткізілетіні сөз болды. Жолдыбай Базар. Дереккөз: «24kz». Фото: remarka.kz.