Жеке жауапкершілікті күшейту талап етілді

Президент Әкімшілігі бас­қарушы лауазымды тұлғалардың Мемлекет басшысы алға қой­ған міндеттерді жүзеге асыру үшін жеке жауапкершілігін күшей­ту жөніндегі саясатын жалғас­тыруда. Апта сайынғы пішінде Мем­лекет басшысының актілері мен тапсырмаларын сапалы жә­не уақтылы орындау бойынша Премьер-Министр Кеңсесі бас­шы­лығының, министрлердің орын­басарларының, жауапты хат­шылардың, облыс әкімдері орын­басарлары мен ұлттық ком­паниялар басшыларының жүр­гізіліп жатқан жұмыс туралы есептерін тыңдау өткізіледі. Президенттің 2010 жыл­дың 27 сәуіріндегі №976 Жар­лы­ғына сәйкес кезекті есеп беру қо­рытындылары бойынша Мем­лекет басшысының тапсырмаларын сапасыз орындағаны үшін 5 саяси мемлекеттік қызметкер тәртіптік жауапкершілікке тартылды. Премьер-Министрдің өкі­мімен Мемлекет басшысының «Ел агроөнеркәсіп кешенін дамы­тудың 2020 жылға дейінгі бағдар­ламасын жасау бойынша» тапсырмасын сапасыз орындағаны үшін Ауыл шаруашылығы вице-министрі С.Омаровқа ескерту жарияланды. Астана қаласы, Шығыс Қа­зақ­стан, Қарағанды, Маңғыстау облыстары әкімдерінің өкімдерімен: – Мемлекет басшысының «Ком­муналдық қызмет пен Жер­ұйық саябағының құрылысына төлем үшін біртұтас төлем құ­жа­тын енгізу бойынша» тапсырмасын сапасыз орындағаны үшін Астана қаласы әкімінің орынбасары В.Л.Крыловқа сөгіс жария­ланды; – Өскемен қаласындағы Қан орталығы құрылысын аяқ­­тау мерзімін бірнеше мәр­те ауыс­тырғаны, сондай-ақ, Мемлекет бас­шысының денсаулық сақ­тау нысандары бойынша тапсыр­масы шеңберінде «350 дәрі­герлік амбулаториялар мен емханалар құрылысы бойынша» құжаттамаларды уақтылы жасамағаны үшін Шығыс Қазақ­стан облысы әкімінің орынбасары Е.Текешовке қатаң сөгіс жарияланды, Қарағанды облысы әкімінің бірінші орынбасары Ғ.Мұхамбетовке сөгіс жарияланды, Маңғыстау облысы әкімінің бірінші орынбасары С.Алдашовқа ескерту жарияланды. Президент Әкімшілігі мен Үкіметтің Мемлекет бас­шы­сының тапсырмаларын уақ­тылы және сапалы орындау бой­ынша бірлескен жұмысы жалғастырылатын болады.