Футбол. Еуропа лигасы: «Шахтер» мен «Астана» келесі кезеңге өтті

АСТАНА. 10 шілде. Бүгін Қарағандының «Шахтері» мен Астананың «Астанасы» қарымта армениялық командаларды ұтып, Еуропа лигасы іріктеу раундының келесі кезеңіне өтті. Бұл туралы egemen.kz хабарлады. Қарағандыда жергілікті «Шахтер» Арменияның Гюмри қаласының «Ширак» командасын қабылдады. Қарсыластардың бұдан бір апта бұрын армян жерінде ойналған бірінші кездесуінде қазақстандықтар 2:1 есебімен ұтып қайтқан еді. Ал бұл жолы олар армениялықтарды 4:0 есебімен ойсырата ұтты. Есеп матчтың 12-минутында ашылды. Алаң иелерінің команда капитаны Андрей Финонченко сол қапталдан Ұлан Қонысбаев берген допты қақпаға қарай ұрды. Ол қонақтардың қақпашысынан кері қайтып, сосын бір қорғаушысына тиіп, қайтадан қақпаға бағытталып, жібек торға барып топ етті. Ал 26-минутта Ұланның өзі қапталдан берілген допты басымен ұрып, қақпаға түсірді. Кеншілер мұнымен де тоқталған жоқ. Олар үзіліске дейін тағы бір гол салып, есепті 3:0-ге жеткізді. Оны команданың дебютанты Никола Покривач өз есебіне жазды. Екінші тайм басталғаннан кейін қарағандылықтар ойынның ақырғы нүктесін қойды. Оны 49-минутта Андрей Финонченко қақпаға жөнелтті. Осылайша екі ойынның қорытындысы 6:1 болды. Енді екінші квалификациялық раундта «Шахтер» Люксембургтің «Дифферданж» және Клайпеданың «Атлантас» (Литва) командаларының жеңгенімен ойнайды. Осының соңын ала «Астана-Аренада» жергілікті «Астана» мен Ереванның «Пюник» командалары арасындағы ойын аяқталды. Ол 2:0 есебімен алаң иелерінің пайдасына шешілді. Бұл қарсыластардың 3 шілде күні Армения астанасында өткен бірінші кездесуінде Қазақстан футболшылары 4:1 Астаналықтар есепті 13-минутта ашты. Оны Бауыржан Жолшиев салды. Ал екінші гол меймандар қақпасына 80-минутта түсті. Ол Дмитрий Шомконың күшімен салынды. Сөйтіп, екі ойынның есебі 6:1 болды. Дамир Қожамқұл. Дереккөз: egemen.kz. Фото: vesti.kz.