Медицина • 20 Сәуір, 2024

Дәрігерлерге жаңа награда беріледі

105 рет
көрсетілді
2 мин
оқу үшін

Сенат депутаты Нұртөре Жүсіп «Қазақстан Республикасының кейбір заңнамалық актілеріне денсаулық сақтау мәселелері бойынша өзгерістер мен толықтырулар енгізу туралы» Заңына қатысты жаңалықтар мен маңызды мәселелерді әлеуметтік желідегі парақшасында талқылады, деп жазады Egemen.kz.

Дәрігерлерге жаңа награда беріледі

Фото: Pixabay.com

Сенатор аталған Заңға енгізілген түзетулер жас ұрпақтың денсаулығын сақтау мен медицина қызметкерлерін құқықтық және қаржылық тұрғыдан қорғау жүйесін енгізуге және олардың жауапкершілігін арттыруда маңызы зор екенін атап өтті.

«Дәрігерлерге мемлекет тарапынан бірқатар жақсы жағдайлар жасалып жатыр.

Заң арқылы медицина қызметкерлерінің кәсіби жауапкершілігін сақтандыру тетігі енгізілді (Заң ресми жарияланғаннан кейін 6 ай өткен соң қолданысқа енеді).

Сонымен қатар медицина қызметкерлерін қолдауға бағытталған түзетулер қабылданды. Атап айтқанда:

тұрғылықты жері бойынша мектепке дейінгі ұйымдардан балалары үшін басым тәртіппен орын алу, кәсіби қызметіне заңсыз араласудан және кедергі келтіруден қорғау, мамандығына құрметпен қарау, медициналық мамандығы бойынша әскери қызметін өткеру немесе әскери қызметке шақыруды кейінге қалдыру құқықтары берілді;

«Қазақстанның еңбек сіңірген дәрігері» құрметті атағы – мемлекеттік наградасы белгіленді;

басы артық есеп немесе ақпарат беруден босату үшін денсаулық сақтау саласындағы уәкілетті орган бұдан былай медицина қызметкерлері толтыруға міндетті құжаттама тізбесін бекітеді;

аса тапшы мамандықты меңгерген медицина қызметкерлері ауылдық жерге кемінде 5 жыл жұмыс істеуге келген жағдайда, оған ең төменгі жалақының 100 еселенген мөлшерінде бірреттік ақшалай төлем беріледі», деп жазды Нұртөре Жүсіп.

Сондай-ақ, сенатор Заңда шегуге келмейтін темекі өнімдерін, вейптерді, хош иістендіргіштерді және оларға арналған сұйықтықтарды сатуға, таратуға, сондай-ақ оларды жарнамалауға тыйым салу қарастырылғанын мәлімдеді. (Бұл норма ресми жарияланғаннан кейін 60 күн өткен соң қолданысқа енгізіледі).