Балқаштан жолдаған гуманитарлық көмекте азық-түліктер, күрек, қажетті құрал-саймандар, кілем, төсек-орындар мен жеке гигиеналық заттар, өзге де қажетті заттар қамтылған.
– Біз баспанасынан айырылып, көңіліне қаяу түскен бұқараның жағдайымен таныспыз. Қазір көптеген өңірде су тасқыны жүріп, адамдар зардап шегіп жатыр. Осыны естіп, көріп отырған Балқаш көлі жағасын жайлаған Шашубай, Ақжайдақ, Дересін сияқты ауылдардың халқы үнсіз қалмады. Мен бастама көтерген күннен жергілікті белсенді Ғабит, Құрмаш, қаладағы жүк тасымалымен айналысатын «Газель» көлігін жүргізетін жігіттер қолдау танытып, қаражат жинауды бастады. Халықтан 5 млн теңге қаржы жиналды. 4 млн теңгеге керек заттар алынды. 1 млн теңге жол шығынына қарастырылды. Балқаш қаласының әкімдігі де жол шығынына 1 млн теңге қаржы бөлді. Басты мақсатымыз – халықтың аманатын Құлсарыға жеткізу, – дейді белсенді топтың жетекшісі Біржан Мақсұт.
Қоғам белсендісі Ғабит Жақыпов құтқарушыларға үрмелі қайық, суда киетін етік пен арнайы киімдер, су сорғызатын құрылғылар, бөгет жасауға арналған қаптарды көптеп алғандарын жеткізді.
– Құлсарыдағы зардап шеккен халыққа көмек ретінде алты «Газель» жүкті аман-есен жеткізіп бердік. Осы орайда барлық жанашыр тұрғынға алғысымды білдіргім келеді. Қала әкімі Сапар Сатаев бастаған қала әкімдігінің мамандарына, қайырымдылық іспен айналысып жүретін Анар Адамбековаға, кәсіпкерлерге, қолұшын берген өзге де этнос өкілдеріне, тіпті игі істен қалыс қалмаған студент жастарға дән ризамын. Біржан Мақсұт есімді жақсылыққа жаршы болған бауырымызға, оны қолдаған барша азаматқа ризашылығымыз шексіз. Ербол, Ғазиз, Құрмаш, Амандық есімді арда азаматтар құрбандық шалып, елдің амандығын тілеп, құран оқытып, Құлсарыға жолға шығатын адамдарға ас берді. Жақсылық жасап жарысқан жұртты көргенде, бірлігіміздің бекем екеніне көзіміз жетті. Құлсарыдағы ел-жұртқа барынша басу айтып, бірге екенімізді жеткіздік. Олар да алғысын жаудырып жатыр, – дейді Ғабит Жақып.
Балқаш қаласынан Құлсарыға бағыт алған қайырымдылық керуеніне тұрғындар әлі де қаржы аударып жатыр. Балқаш өңірінің жанашыр азаматтары мен еріктілері түскен қаржыны арнайы ашылған есепшоттарға аударады.
Балқаш қаласы
