Спорт • 24 Мамыр, 2024

ШЫҰ шеңберіндегі спорт: Тәжірибе алмасу және жаңа бастамалар

61 рет
көрсетілді
2 мин
оқу үшін

Алматыда Шанхай Ынтымақтастық Ұйымына мүше мемлекеттердің дене шынықтыру және спорт саласына жауапты министрлік басшыларының кеңесі өтті. ШЫҰ-ға мүше мемлекеттер арасындағы әріптестікті одан әрі дамыту мен нығайтудың маңызды мәселелері талқыланған жиында сала министрі Ермек Маржықпаев спорт – ШЫҰ аясындағы өзара іс-қимылдың негізгі бағыттарының бірі екенін атап, Қазақстан ШЫҰ кеңістігінде спорттың дамуына үлес қосуға мүдделі екенін жеткізді, деп хабарлайды Egemen.kz аталған министрліктің баспасөз қызметіне сілтеме жасап.

ШЫҰ шеңберіндегі спорт: Тәжірибе алмасу және жаңа бастамалар

Фотолар: Turizm jane sport ministrligi

Министр Қазақстанның мемлекеттік саясатының маңызды бағытының бірі – бұқаралық спортты дамыту екенін айтты. Бүгінгі күні дене шынықтырумен және спортпен жүйелі түрде айналысатындар халықтың жалпы санының 40,4 %-ын құрайды. 2021 жылдан бастап спорт секцияларын жан басына қаржыландыру арқылы мемлекеттік спорт тапсырысын іске асыру тетігі енгізілді. Нәтижесінде осы күні 240 мың бала мен жасөспірім 7 мыңнан астам спорт секциясына тегін барады.

«Тәжірибе алмасу және жаңа бастамаларды талқылау арқылы біз ұйым кеңістігінде ғана емес, әлемде де бірлескен күш-жігермен спорттық күн тәртібін қалыптастыра аламыз. Сонымен қатар біздің спортшылар спорт бәсекелерінде бір-біріне негізгі қарсыластар саналады. Десе де, дәл осындай бәсекелестік біздің спортшыларымыздың тәжірибесін арттыруға зор мүмкіндік береді», деді Ермек Маржықпаев.

Министрлік

Айта кеткен жөн, 2023 жылы Қазақстан спортшылары ШЫҰ-ға мүше мемлекеттер аумағында 50-ден астам жаттығу жиынын өткізген.

Іс-шараға қатысушылар бірлескен оқу-жаттығу жиындарын өткізу туралы идеяларын айтып, спорттық медицина мен ғылым саласында тәжірибе алмасу және ынтымақтастық мәселелерін талқылады.

Министрлік

Жиын соңында Ермек Маржықпаев ШЫҰ-ға мүше мемлекеттердің дене шынықтыру мен спорт саласына жауапты министрлік басшыларын биыл қыркүйек айының 8-13 күндері аралығында Астанада өтетін 5-ші Дүниежүзілік көшпенділер ойындарына қатысуға шақырды.