Петропавлда көпбейінді қонақ үйдің құрылысы басталды

ПЕТРОПАВЛ. 11 маусым. Облыс орталығында халықаралық стандарттағы “Hampton by Hilton” қонақүйінің құрылысын бастауға арналған шара өтті. Оған облыс әкімінің орынбасары Ерлан Әукенов қатысып, инвестор “Nord hotel Group” ЖШС-нің игілікті ісіне сәттілік тіледі. Бұл туралы әкімдіктің баспасөз қызметі хабарлады. Аталмыш нысанның құрылтайшысы Дмитрий Кошелевтің айтуына қарағанда, қонақүйдің жобасы арнайы тапсырыс бойынша Мәскеуде жасалған. Жобаның құны 300 миллион ресей рублін, жалпы аумағы 10900 шаршы метрді құрайды. Құрылысқа “Nord hotel Group” ЖШС-нің жеке инвестициясы жұмсалады. Сонымен бірге банк несиесінің сыйақысын демеуқаржыландыруға және инфрақұрылымдар тартуға “Бизнестің жол картасы - 2020” бағдарламасы мен “Даму” қоры арқылы мемлекеттік қолдау көрсету жоспарланған. Бас мердігер – “Ударник СК” ЖШС. Жеті қабаттан тұратын 4 жұлдызды көпбейінді қонақүй кешенінің жоғарғы 5 қабатында 120 нөмір орналасады, оның 2-уі – президенттік, 2-уі – люкс, 10-ы – делюкс, 106-сы – стандартты нөмірлер. Заманауи ғимаратта конференция залы, фитнес орталығы және мейрамхана орналасады, ал төменгі екі қабат сауда бутиктері мен супермаркеттерге арналады. Облыста теңдесі жоқ құрылысты 2016 жылы маусым айында Қызылжар өңірінде Қазақстан және Ресей Президенттерінің қатысуымен өтетін аймақаралық форум қарсаңында аяқтау көзделіп отыр. «Халықаралық талаптарға жауап беретін алғашқы көпбейінді қонақүй кешені өңірде іскерлік туризмді дамытуға, қонақтарды жоғары деңгейде қабылдауға мүмкіндік береді. Инвестор мен бас мердігер құрылысты уақытылы іске қосуға  беруге уәде етіп отыр», дей келіп,  облыс әкімінің орынбасары Ерлан Әукенов жергілікті құрылыс материалдарын барынша пайдалануды  атап көрсетті. «Мен Петропавл қаласының тумасымын. Осында тұрамын. Өз жерімнің патриоты ретінде облыс орталығында басқаларға ұқсамайтын бірегей нысан салуды ойластырып жүргенмін. Ол үшін барлық мүмкіншілікті пайдаланамыз, деді инвестор Дмитрий Кошелев. Салтанатты рәсімнен кейін “Hampton by Hilton” қонақүйінің құрылысына арналған капсула тасқа бұрғыланған ойыққа орнатылды. Өмір Есқали. Дерек: Солтүстік Қазақстан облыстық әкімдігінің баспасөз қызметі. Сурет: egemen.kz