Қарт Торғайдың төсінен түлеп ұшқан тұғырлы талантқа өнердің қай түрі де жат болған емес. Бала күнінен өнерге ғашық болып өскен өрен алғаш оқырмандарға шымшыма әзілі бар сықақ өлеңдерімен, мұңлы әсем әндерімен танылды. Әсіресе автордың сатира жанрында жазылған «Бастау», «Алаңғасар», «Көршілер» «Жетпіс жетінің жігіттері» атты жинақтары сыншылар тарапынан жоғары бағаланды. Қонағаң журналистика саласында да айшықты із қалдырды. Алғашқы еңбек жолын аудандық газеттен бастаған қаламгер облыстық «Торғай таңы», одан кейін сол кездегі «Лениншіл жас» (қазіргі «Жас алаш») газетінің меншікті тілшісі болып, қоғамдағы сан алуан өзекті мәселені батыл көтерді. Кейін қалалық «Арқалық таңы» газеті мен Торғай облыстық телерадио компаниясын басқарды.
Ел талантына сүйсінген асыл азаматтың тағы бір қыры – суырыпсалма ақындығы. Ол сонау 80-жылдардың басынан халқымыздың ғажайып мұрасы – айтыс өнерінің қайта жандануына қомақты үлес қосты. Қонысбай аға басына үкі таққан бөркісімен сахнаға шыға келгенде көз алдымызға қазақ сал-серілерінің бейнесін елестететін. Айтыста «Торғайдың топжарғаны» Нұрхан Ахметбековті пір тұтты. Әсіресе арқалы ақынның Көкен Шәкееев, Көкбай Омаров, Әселхан Қалыбекова, Әсия Беркенова, Қатимолда Бердіғалиев, Шынболат Ділдебаев, Ерік Асқаров секілді ақтаңгерлермен айтысы төл өнеріміздің үздік үлгілеріне айналды.
Сондай-ақ Қонысбай Әбіл Астана – бас шаһар болған жылдардан бастап, елордада мемлекеттік тілді дамыту ісінің негізін қалап, ана тілімізді өркендету жолында бел шешіп еңбек етті.
Ақынды еске алу кеші өзгеше форматта өтті. Бұл жолы сахнада қаламгердің туындылары ғана сөйледі. Тек қана Қонағаңның жақын серігі, көрнекті ақын, Мемлекеттік сыйлықтың лауреаты Ұлықбек Есдәулет досы туралы жылы естелігімен бөлісті.
«Адам өмірі мазмұны бөлек кітап секілді. Әркімнің де жүрек кітабы бар. Қонысбай аузын ашса жүрегі көрінетін жігіт еді. Жанының кеңдігі бірде сайын далаға, енді бірде асқар тауға ұқсаушы еді. Оның сатирасы да, лирикалық жырлары да керемет. Қай шығармасы болмасын, өмірдің өзінен ойып алынғандай оқырманға әсер етеді. Сан қырлы талант иесі болатын. Кез келген музыкалық аспапта шебер ойнайтын. Туған жері – Торғайды ерекше жақсы көрді. Астанаға қоныс аударғаннан кейін мемлекеттік тілдің мерейін көтеруге бар күшін жұмсады. Шындығын айтқанда, Қоқаңның қалаға сіңірген еңбегі ерекше. Сондықтан елорданың бір көшесіне Қонысбайдың есімі берілсе, артық емес», деді ол.
Кеш барысында ақынның өзі шығарған әндері мен сөзіне жазылған шығармаларын Қазақстанның Еңбек сіңірген қайраткерлері Нұрлан Өнербаев, Айгүл Қосанова, Клара Төленбаева және Перизат Тұрарова, Шахризат Сейдахмет, Өзгеріс Шерікбай секілді дарынды өнерпаздар нақышына келтіріп орындады. Сондай-ақ Арқалық қаласындағы Қонысбай ағаның ізін жалғаған ақындар мектебінінің өкілдері – Айбек Қалиев, Тоба Өтепбай, Батырлан Сағынтаев ұстаз рухына арнап жыр төкті. Ал Жастар театры мен Ә.Мәметов атындағы мемлекеттік драма және комедия театрының актерлері қаламгер шығармаларынан шағын көрініс қойып, көрермендерді жылы әсерге бөледі.
