Ақмола облысында тұрғындарды қауіпсіз жерге көшіруде

АСТАНА. 29 сәуір. Ақмола облысы Целиноград ауданы Оразақ ауылдық округінде Нұра өзеніндегі бөгет бұзылып, жергілікті халық қауіпсіз жерге көшірілуде. Оқиға 28 сәуірде сағат 18:30-дар шамасында болған. Бұл туралы «Интерфакс-Қазақстан» агенттігіне сілтеме жасап, tengrinews.kz хабарлады. Хабарламада айтылғандай, бөгеттің бұзылу салдарынан Оразақ ауылының ескі бөлігін су басқан. Әзірге қанша үй су астында қалғаны нақты белгісіз. Тілсіз жау ауылдың жаңадан салынған бөлігіне жақындап келеді. Целиноград аудандық әкімдігінің хабарлауынша, жергілікті тұрғындарды шұғыл қауіпсіз жерге көшіру жұмыстары басталып кеткен. Ауданнан осы мақсатта 8 автобус оқиға орнына жіберілді. Алғаш болып 7 адамды: қариялар мен аяғы ауыр әйелдерді эвакуациялады. Олар емханадағы 20 адам үшін дайындалған уақытша панаға орналастырылды. Аудан әкімі Малғаждар Тәткеевдің мәліметіне сүйенсек, Оразақ ауылының тұрғындары арасында тасқыннан зардап шеккен және қаза тапқандар жоқ. Аудандық әкімдіктің мәліметі бойынша, аталған ауылда 400-ден астам үй және 2 000-ға жуық тұрғын бар. Өзен суының көтерілуіне байланысты тұрғындардың көп бөлігі бөгет бұзылғанға дейін қауіпсіз жерге көшірілген. Бүгінде қалған тұрғындарды эвакуациялау жұмыстары жүріп жатыр. Тәткеевтің айтуынша, қазіргі таңда ауыл тұрғындарының 70 пайызы қауіпсіз жерге көшірілген. Еламан Қоңыр. Дерек, сурет: tengrinews.kz.