Коллажды жасаған – Қонысбай ШЕЖІМБАЙ, «EQ»
Соңғы 3 жылда облыстық бюджеттен мемлекеттік тапсырыс аясында шығармашылық үйірмелер мен спорттық секцияларға 11,6 млрд теңге бөлініп, игеріліпті. Осы қаржыны жұмсағандар арасында шығармашылық үйірмелердің үлесі басым. Бағдарлама аясында жұмыс істейтін кәсіпкерлерді тексеруді қаражат көп бөлінген Қызылорда қаласы, Шиелі, Жаңақорған, Сырдария аудандарынан бастаған топ біраз былықтың бетін ашты.
Тексеру кезінде басындағы үйін – үйірме, ауласындағы сарайын – секция ретінде тіркеп, ақша алып келгендер анықталыпты. Тіпті, қағазда бар үйірмеге 200 шақырым қашықтағы өзге аудан оқушыларын, басқа облыстағы балаларды «қатыстырып» қойғандар да бар. Бір баланың бірнеше кәсіпкердің есебінде жүргені өз алдына бөлек әңгіме.
Топ өкілдері Жаңақорған ауданындағы 19 кәсіпкердің жұмысын саралап, олардың 127,2 млн теңге мемлекет қаражатын заңсыз иемденгенін анықтады. Оның 106,1 млн теңгесі мәдениетке, ал 21,1 млн теңгесі спорт саласына тиесілі болып отыр. Осы басқармалар басшылары 125 кәсіпкермен келісім-шартты біржақты бұзып, оның ішінде 55 кәсіпкер жұмысын тоқтатты. Қазір олардың қулықпен қалтаға басқан қаражаты қайтарылып жатыр.
«Прокуратура кәсіпкерлер құқығын қорғайтын басты органның бірі. Біз олардың жолындағы түрлі кедергілерді жоюға күш салып келеміз. Бірақ мемлекет қаржысын түрлі айла-шарғымен иемденбек болғандарға тосқауыл қоюға тиіспіз. Мысалы, тексеру кезінде Шиелі ауданында бұрынғы мектеп директорының балаларының атына тіркелген мекемелер арқылы мемлекеттік спорттық, шығармашылық тапсырысқа жалған құжаттар ұсынып, бюджетке 13,3 млн теңге шығын келтіргені белгілі болды. Жалпы, үйірмелерге қатыспаған 2 мыңнан астам бала анықталды. Соның кесірінен бюджет қаржысын майшелпек қылғысы келгендер мемлекетке 450 млн теңгеге жуық залал келтірген. Бүгінгі күнге кәсіпкерлер 48 млн теңгені қайтарды», дейді облыс прокуроры Ризабек Ожаров.
«Даму бала» платформасына тіркелгендер арасынан 5 740 баланың ата-анасы тізімдегілердің шын мәнінде шығармашылық үйірмелер мен спорттық секцияларға қатыспайтынын растап отыр. Жалпы, өнім берушілер тарапынан 13 731 бала тізімнен алынып тасталды. Осындай фактілерге байланысты Қызылорда облысы бойынша сыбайлас жемқорлыққа қарсы қызметі Қылмыстық кодекстің 190-бабы бойынша сотқа дейінгі тергеп-тексеруді бастады.
ҚЫЗЫЛОРДА
