Бұл қасиетті қобыз атадан балаға мұра болып сақталған. Оны музейге 2004 жылы Қостанай облысы Денисов ауданындағы Шоқыбай кентінің тұрғыны Жаңыл Көшерова тапсырған. Негізі иесі – Нұрғали Күзембаев есімді атамыз. Бұл кісі, шамамен 1890-жылдары өмірге келген. Руы ноғайтілеу. Ел ішінде нарқобызбен бақсылық құрған. Адамдарды емдеген. Әсіресе бала сүйе алмай жүрген жандарға жәрдемі тиген.Оған бұл қобыз ағасынан қалыпты.
Ғасырдан астам тарихы бар аспап қарағаштан ойып жасалған. Пішіні ожау тәрізді, мойны иілген. Шанағының ортаңғы бөлігінде ойылған ағаш ақық және металл жапсырмалармен безендірілген. Сондай-ақ шанағының төменгі бөлігіндегі қуыс терімен қапталған.
Нарқобыз – қыл ішекті музыкалық аспаптардың ішіндегі ең көне түрі. Тарихи деректерде нарқобызды бақсылар тәңірмен тілдескенде, жын-перілерді қашырғанда және өзге де діни рәсімдерде тартқан екен. Сонымен бірге оны жаугершілік заманда әскерге рух беру мақсатында қолданған.
