Мәдениет үйінде ұлт перзентінің өмірі мен қызметін еске алу кеші ұйымдастырылды. Шараға қала әкімі Асхат Бердіханов қатысып, мемлекетіміздің дамуына зор үлес қосқан өр тұлғаның ерен еңбегін ерекше атап өтті.
«Қаламызға есімі берілген халқымыздың даңқты перзенті, мемлекет және қоғам қайраткері Дінмұхамед Ахметұлы Қонаев атамыз ел басқарған жылдары кең-байтақ қазақ жерінде 68 жұмысшылар кенті мен 43 қала салынды. Іле өзенінің бойына бөген тұрғызылып, жаңа су электр стансасының бой көтеруіне, осы маңда жаңа Қапшағай қаласының іргетасы қалануына да ерекше ықпал етті», деді қала әкімі.
Қалалық ақсақалдар алқасының төрағасы Базан Оралбаев та өз кезегінде елу жыл ел ағасы атанған мемлекет қайраткері Д.Қонаевтың есімі тарихта алтын әріппен жазылып, халқымен бірге жасайтынын айрықша атады. Мәдени іс-шара әсем әнмен өріліп, бимен көмкерілді.
Салтанатты шара соңында әлеуметтік осал топтағы отбасыларға, кезекте тұрған азаматтарға 80 пәтердің кілті табыс етіліп, қонаевтықтардың қуанышы еселенді. Баспаналы болып, қуанышқа кенелген отбасылар мемлекеттің жасаған қамқорлығына жүрекжарды алғыстарын жаудырды.
«Өзім көпбалалы анамын, 7 балам бар. Үй кезегінде 17 жылдан бері тұрған едім. Бүгін атамыздың туған күнінде қолымыз жетті. Қуаныштымын. Әлеуметтік осал топтағыларды, көпбалалы аналарды, жетімдер мен ардагерлерді қолдап жүргендеріңізге алғысымыз шексіз», деді жаңа үй иесі Назым Ахметова.
Пәтерлер жекешелендіру құқығынсыз жалға берілді. Жалға алу құны – қолжетімді. Былтыр Қонаевта 85 отбасына пәтер кілті табысталған болатын.
Жалпы, Қонаев қаласында жыл басталғалы бері жағымды жаңалықтар жібін үзбей жалғасып келеді. Атап айтсақ, Орталық саябаққа қазақ әдебиетінің классигі Бердібек Соқпақбаевтың есімі берілсе, артынша осы саябақтан мұз айдыны ашылып, қалалықтарды шат-шадыман етті.
Алматы облысы,
Қонаев қаласы
