Аудан орталығынан 80 шақырым шалғайда жатқан Қараоба ауылындағы Қайбушевтар әулетін ауылдастары жақсы біледі. Талай жылдан бері қайырымдылық пен қамқорлықтың, қарапайымдылықтың үлгісін көрсетіп жүрген отбасының ізгі ісі атадан балаға жалғасып келе жатыр. Осы ауылдың атымтай-жомарты атанған, «Ақбота» шаруа қожалығының жетекшісі, марқұм Мереке Ермекұлы да еңбекқор жұмысшыларын үнемі қолдап, тіпті автокөлік мінгізіп те жіберетін. Ауылдағы мұқтаж жандар, ардагерлер әрдайым Мереке Қайбушевтің көз қырында, қамқорлығында жүретін. Міне, осы үлгі бүгінде Қуаныш Мерекеұлына да жұғыпты.
Ауыл шаруашылығында талай жылдан бері тер төгіп жүрген қарапайым еңбек адамы Серікқали Сәрсенғалиұлы үшін 2025 жыл үлкен қуанышпен басталды. Қожалық жетекшісі қызметкерінің ұзақ жылғы адал еңбегін бағалап, автокөлік сыйға тартты. Ұжымда он жыл қызмет атқарған Арайлым Ермағанбетқызы бұл күні су жаңа жатын бөлме жиһазына ие болды.
Көпшілік жақсы біледі, ауыл шаруашылығында демалыс болмайды. Маусымдық жұмыстар бірінен соң бірі алмасып келеді де отырады. Дәл қазір шаруа қожалығы қыстың қысымынан аман шығу үшін барын салып жатыр. Өткен жаздың қуаңшылығы, есепсіз көбейген ақбөкеннің салдарынан мал азығының тапшы болуы ауылдағы ағайынға оңай тиіп отырған жоқ. Соған қарамастан, қарапайым жұмысшыларды қолдап, еңбегін бағалап отырған қожалық жетекшісіне халық ерекше риза болды.
Қазталов аудандық мәслихатындағы «Amanat» партиясы фракциясының мүшесі, «Ер-қанат» шаруа қожалығының жетекшісі Қуаныш Қайбушев биыл Президент бастамасымен жарияланған «Жұмысшы мамандықтар жылын» осындай бастамамен ашып отыр.
Батыс Қазақстан облысы
