Күдікті былтырға дейін әр жаңа қатысушы үшін 10%-дан 300%-ға дейін табыс беремін деп сендірген. Салым құны маркетингтік стратегияға байланысты 7 500-ден 2 млн теңгеге дейін өзгеріп отырған. Осылайша, тартылған қаражаттың жалпы сомасы 286 млн теңгеден асқан.
Қаржылық тергеу жүргізу барысында күдікті заңсыз жолмен алынған қаражатқа элиталық тұрғын үй кешенінен 36 млн теңге тұратын пәтер сатып алғаны анықталды. Соттың санкциясымен аталған пәтерге тыйым салынды. Сондай-ақ сот күдіктіге «ешқайда кетпеу және тиісті мінез-құлқы туралы қолхат» түріндегі бұлтартпау шарасын таңдады. Тергеу әлі жалғасып жатыр.
Анықталғандай күдіктінің қырық өтірігіне сеніп, сан соғып қалған 35 азамат жеңіл табысты көздеген. Басым көпшілігі – зейнеткерлер. Олар өз жинақтарының басқа салымшылар арасында ақша бөлу схемасының бір бөлігіне айналатынын сезбеген.
Ал Бас прокуратура мен Ішкі істер министрлігінің қызметкерлері Қазақстанның Грузиядағы елшілігінің көмегімен бірнеше рет алаяқтық жасағаны үшін Қазақстан азаматын қылмыстық жауапкершілікке тарту үшін Тбилисиден экстрадициялады.
2020 жылы аталған тұлға адамдар тобының алдын ала сөз байласуымен субсидия алуға көмек көрсету сылтауымен Ұлытау облысының 88 тұрғынының қаражатын иемденіп, жалпы сомасы 30 млн теңгеден аса шығын келтірген.
«Екі сыбайласы әртүрлі жазаға тартылды, ал күдікті қылмыс жасағаннан кейін қашып кетті, сондықтан оған халықаралық іздеу жарияланды. 2024 жылы ол Грузия аумағында анықталып, Қазақстанның Бас прокуратурасының сұрау салуы бойынша елге қайтарылды. Қазір күдікті Ақтау қаласының тергеу изоляторына қамауға алынды. Айыпталушыға қылмысты жасағаны үшін мүлкі тәркіленіп, үш жылдан жеті жылға дейін бас бостандығынан айыру жазасы қарастырылған», деді министрліктердің баспасөз қызметі өкілдері.
Субсидияға қатысты алаяқтық солтүстік өңірден де тіркелді. Қаржылық мониторинг агенттігі Солтүстік Қазақстан облысы бойынша департаменті ауылшаруашылық өндірістік кооперативі басшысының 50 млн теңгеден аса субсидияны заңсыз алу схемасын анықтады. Мемлекет жоғары сапалы сүт өндірісін арттыру және импортқа тәуелділікті төмендету үшін сүт-тауар фермаларын ашуды белсенді түрде қолдап, ынталандырып жатыр. Алайда өндірістік кооперативінің басшысы 2019 жылдың мамырынан 2020 жылдың наурызына дейінгі аралықта жалған құжаттарды пайдаланып, сүт өнімдерін өңдеуге бөлінген 50 млн теңгеден аса субсидияны заңсыз алған.
Өндірістік шығындарды растау үшін ауыл шаруашылығы басқармасына жеке кәсіпкерлерден шикі сүт сатып алғаны үшін өзара есеп айырысу туралы жалған құжаттар және май өндірісі туралы қасақана жалған ақпараттар беріп келген. Нәтижесінде, сот сүт жеткізу мәмілелерін заңсыз деп таныды. Қаржылық тергеу аясында заңсыз алынған субсидияларға күдікті «Toyota land cruiser prado 150» маркалы автокөлік сатып алғаны анықталды. Ол мүмкін болатын тәркілеуден жасыру мақсатында сенімді адамға рәсімделген. Соттың санкциясымен аталған автокөлікке тыйым салынды. Ал күдіктіге қатысты сот екі айға «қамауға алу» түрінде бұлтартпау шарасын тағайындады.
Көкшетауда тұрмыстық техниканы жалға алумен айналысатын кәсіпкерлер алаяқтың құрбаны болды. Олар WhatsApp мессенджерінде техника туралы ақпарат алмасады және жаңалықтармен бөліседі. Топ мүшелерінің бірі белгісіз адам одан «Kärcher» маркалы шаңсорғышты жалға алып, байланысын тоқтатқанын хабарлады. Бұл хабарламаға тағы бір кәсіпкер «Alteco» шой балғасын жалға алған адам жоғалып кеткенін айтып, жауап берді. Көп ұзамай топтың үшінші мүшесі алаяқтың құрбаны болғаны белгілі болды. Зардап шеккендердің үшеуі Көкшетау қаласының полиция басқармасына алаяқтық әрекеттер туралы арызбен жүгінді. Полицейлер дереу сотқа дейінгі тергеп-тексеруді бастады. Жедел-іздестіру іс-шаралары барысында олар ұрланған техниканы жергілікті ломбардтардың бірінен тауып, қылмысқа қатысы бар 29 жастағы ер адамның жеке басын анықтады.
Жалпы, Бас прокуратураның ресми мәліметіне сүйенсек, былтыр елде 45 мыңнан аса алаяқтық дерегі тіркелген. Ал бұл барлық қылмыстық істің 34 пайызын құрайды.
