Ән мен би – адам мен әлемнің үндестігі. Жаныңа сезім сыйлай алатын, жүрекпен сөйлейтін өнер. Сахнаға шыққан бишінің әр ұлттың төл әуеніне ырғалып, қимылдаған қозғалысы сол елдің мұрасын жаңғыртқандай әсер қалдырады. Ал әні ішкі жан дүниесінің тереңдігін, болмысын аша түседі. Осы қуатты құралды «Birlik» ансамблі игі мақсатта қолданып келеді. Әр этностан құралған өнерпаздар ортақ сахнада өнер көрсетіп, өзара мәдени алмасуды күшейтіп, елде біртұтас ұлт қағидатын нығайтуға септесіп жүр.
Алғаш ұжымды жасақтауда еліміздің әр бұрышында кастинг өткізіліп, түрлі этнос өкілдері мен мультиинструменталистер арасынан 20 үздік биші мен музыкант таңдалған. Олардың қабілет-қарымын, техникаларын шыңдауда, композицияларды дайындауда осындай ұжымдарда өнер көрсетіп жүрген, тәжірибесі бар, алыс шетелден мэтрлер мен мықты мамандар шақырылған. Олардың қатарында Ресей, Татарстан, Өзбекстанның еңбек сіңірген қайраткерлері бар.
«Бастапқыда ансамбльдің құрамында 20 биші болса, қазір 24-ке көбейді. Қазақстанның еңбек сіңірген қайраткері Қарлығаш Әжиева осы ансамбльдің алғашқы концертінің қоюшы-режиссері болды. Ол өнер ұжымына көптеген талантты тауып, сахнаға шығаруға көмектесті. Ал бас балетмейстер ретінде Жанатай Кожабеков шақырылды. Биыл еліміздегі маңызды оқиғалардың бірі Қазақстан халқы Ассамблеясының 30 жылдық мерекесі тойланғалы отыр. Осыған орай 30 қаңтарда Алматы қаласының тұрғындары мен қонақтарына арнап жеке концертімізді өткіздік. Іс-шарада өнер ұжымы қазақ, орыс, әзербайжан, тәжік, ұйғыр, чешен, корей және татар халықтарының билерін орындады. Бір айта кетерлігі, көрермендер дәл осы концертте «Жігер» неоқазақ биінің премьерасын тамашалады», деді «Birlik» ансамблінің көркемдік жетекшісі әрі бишісі Анель Марабаева.
Ансамбльдің бірегей репертуары елдегі 100-ден аса этностың музыкалық мұрасы мен өнерін қамтиды. Қазақтың «Күй шашу», орыстың «Русский танец», өзбектің «Дучава», қырғыздың «Эргеме», татардың «Ақ Идель», тәжіктің «Чилваи Хиромон», т.б. билері бар. Мұны былтыр тұсаукесер салтанатында Мәдениет және ақпарат министрі Аида Балаева ерекше атап өткен еді.
«Өз ісіне, өнеріне жан-тәнімен берілген дарынды әртістердің арқасында біздің бай мәдениетіміз бен тарихымыз ұрпақтан-ұрпаққа жалғасады. Бұл халықаралық ареналарда айқын көрініске ие. Ансамбльдің тұсаукесері Алғыс айту күніне орайластырылған. Осылайша, әртүрлі этносты біріктіретін, бірлік пен үйлесімнің нышанына және Қазақстанның төл брендіне айналатынына сенімдімін», деді А.Балаева.
Ансамбль аз ғана уақыт ішінде біраз биікті бағындырып үлгерді. Өркениет көшіне ілескен әлемнің бірқатар елінде, атап айтқанда Түркия, Ресей, Түрікменстанның өнерсүйер қауымын тамсандырды. Биыл тіпті Еуропаға аяқ басып, концерт беруді де жоспарлап отыр.
«Birlik» – жастардың ортақ идея айналасында жұмылып, қоғамның игілігі үшін бірлесе алуының айқын дәлелі. Ұжымның бөлшегі болу шығармашылықты арттырып қана қоймайды, ұжым мүшелерінде ынтымақтастық пен түрлі мәдениетке деген құрметті қалыптастырады. Осылайша, қазақ өнерін жаңа деңгейге көтеріп, халықаралық аренада Отанымыздың бай ұлттық өнерін таныстырып, еліміздің мәдени әртүрлілігін көрсететін бірлік пен келісім идеясын насихаттайды. Сондай-ақ өнер ұжымы әлемнің жетекші хореографтары және музыканттарымен мәдени ынтымақтастықты белсенді қолдап келеді. Енді халықаралық фестивальдар мен конкурстарға қатысуды көздеп отырмыз», деді А.Марабаева.
Демек өнер – шығармашылықтың ғана көрінісі емес, бірліктің де символы. Бұл адамдар арасындағы айырмашылықтарды ұмытып, ортақ идея мен мақсатқа бағындыра алады. Мұның күші – ортақ тілде сөйлей білу, жүректен жүрекке жету, әлемді ізгілікке жетелеу жолында бір болу.
