Драматургтің ойындағысын сахнаға сәтті алып шыққан шығарма режиссері Бибіажар Диханның кәсібилігі де рөл ойнағандай. Мұндай биік дәрежеде көркемдей алғанына драматургтің өзі де қайран.
«Сәкен театрының актерлері психологиялық драманың болмысын, моралін сезініп ойнады. Тіпті актерлік шеберліктері арқылы кейіпкерлерді шынайы етіп көрсетті. Диалогтер өте сәтті шықты. Режиссерге де алғысым шексіз. «Мен осындай дүниені жазыппын-ау», деп таңғалғанымды несіне жасырамын?» дейді Қазыбек Аманжол.
Психологиялық драмадағы Маринаның рөлін Сая Бекбосынова, Алинаны Айғаным Айтбаева, студентті Нұртілек Асылбек, кемпірді Гүлнар Базарбаева, молданы Рахат Қошжанов, үшінші әйелді Саягүл Тәшімбекова, екінші еркекті Талғат Садықов, екінші әйелді Аружан Каленова, бірінші еркекті Амангелді Мұқашев, бірінші әйелді Нұрбибі Мұқан, кәсіпкерді Бауыржан Нұрмағанбетов, саудагерді Жандос Шәкен, Закирді Ахай Жұмамұратов сәтті сомдап шыққан.
Жол. Жолаушы... Жер бетіндегі тіршілік иесінің барлығы да – өмір сапарында жүрген жолаушы. Ол сапар бірде өрге бастайды, енді бірде төменге құлдилайды.
Өзіндік планета іспетті «018-автобуста» тағдырлары тоғысқан әр кейіпкердің өз ақиқаты бар. Адамдық пен надандық, кесірлік пен кесапаттық, адалдық пен арамдық арпалысқа түсетін бұралаң жолда апаттан аман қалғанының да, аруаққа айналғанының да көрерменге айтары, салар ойы негізді.
Сөйтіп, шығармашылық ұжым «018-автобуста» табысқан түрлі тағдырдан психологиялық портреттер галереясын жасапты. Автобус ішіндегі әлем арқылы бүгінгі қоғам келбетін бедерлеген.
Автобуста молда, кәсіпкер, әйел, өрекпіген жігіт отырады. Арасында жүкті әйел де бар. Әңгіме автобустағылар жүкті әйелдердің қоғамдық көлікте қатынауына наразылық білдіруінен басталады. Кикілжің содан өрбиді. Молда болса уағызын айтып, кәсіпкер болса байлығын айтып масаттанады. Ал әйел жаралы жан сырын ақтарады. Өзін ақтау үшін қоршаған ортасын, қоғамды кінәлайды. Іс насырға шапқан соң, қоғамдық көліктегі жас дәрігер жүкті әйелді басқа көлікке отырғызып жібереді. Драманың соңында 018-автобус жол апатына түсіп, жолаушылардың барлығы тіл тартпай кетеді. Осылайша, автор үлкен өмірге шыр етіп келетін кіршіксіз нәрестені кірлеген қоғамнан арашалап, аман сақтап қалады.
Иә, психологиялық драма бірнеше буынның санасы дертке ұшырағанын жеткізгендей. Түйінінде жас ұрпақты қоғам дертіне ұрындырмай сақтап қалғаны көрермен санасына сәуле құйғандай әсер берді.
Қарағанды облысы
