Суретті түсірген – Қайсар Есенов, Қазақ күресі федерациясы
Жарыстың ашылу салтанатында Qazaq kuresi қауымдастығының бас директоры Дамир Бекбосынов: «Үндістанда қазақ күресі белсенді түрде дамып келеді. Бүгінге дейін аталған мемлекетте спорттың осы түрінен төрт рет ел чемпионаты ұйымдастырылды. Сіздердің төл өнерімізге қызығушылық танытып жүргендеріңіз – біз үшін үлкен мақтаныш. Екіжылдықтың басты додасында бақ сынайтын балуандарға сәттілік тілеймін, деді.
Ерлер арасындағы бәсеке сегіз салмақта өтіп, соның жетеуінде біздің жігіттер қарсылас шақ келтірмеді. Атап айтсақ, Бекжан Төлепов (55 кг), Мейіржан Берекетов (60 кг), Нұр Аманшүкіров (66 кг), Жұмажан Қожамбеков (74 кг), Ерсін Сейітқазынов (82 кг), Айдос Ғалымов (90 кг), Ерсұлтан Мұзафаров (100 кг) бас жүлдені қанжығаларына байлады. Тек аса ауыр салмақта қазақ балуандары топ жара алмады. Финалда Нұрдәулет Жарылқапов жеңілістің кермек дәмін татты. Өзбекстанның алыбы Мұқсын Хуссимудиновқа есе жіберді. Жүлделі орынды иеленгендер қатарында Үндістан, Грузия, Әзербайжан, Польша, Тәжікстан, Эстонияның апайтөстері бар.
Әйелдер сайысында Айжан Жылқыбаева (48 кг), Рауза Нұрмұхамбетова (56 кг), Зарина Зәріпова (65 кг), Әлбина Бақиева (+77 кг) алтыннан алқа тақты. Роза Нысантайқызы (70 кг) финалда нидерландтық Сем Ван Дуннан ұтылып, күміс медальды еншіледі. Аружан Адасқан (52 кг) мен Гүлім Елубай (60 кг) қола медальды иеленді. Өзге салмақ дәрежелерінде Ситора Елмұродова (52 кг), үндістандық Анну Анну (60 кг), грузиялық Нино Одзелашвили (77 кг) озды.
Спорттық іс-шара барысында UWW техникалық делегаты Онур Шимшек Qazaq kuresi қауымдастығының бас директоры Дамир Бекбосыновтың Біріккен күрес әлемінің (UWW) ұлттық күрес түрлері комитеті атқарушы кеңесінің мүшелігіне қабылданғанын жариялады.
Тағы бір айта кетерлік жайт, төрткүл дүниенің 40-тан астам мемлекетінде Қазақ күресі федерациялары жұмыс істейді. Бүгінге дейін спорттың осы түрінен 10 әлем чемпионаты, 12 Азия біріншілігі, 6 Әлем кубогі мен 6 Еуропа чемпионаты өтті. 2023 жылы қазақ күресі Эр-Рияд қаласында өткен Дүниежүзілік жекпе-жек ойындарының бағдарламасына тұңғыш рет енді. 2024 жылғы V Дүниежүзілік көшпелілер ойындары аясындағы қазақ күресі жарысына 46 мемлекеттен 300-ден астам спортшы қатысты. Қазақ күресі ойындардағы ең көп спортшы қатысқан спорт түрі болып танылды.
