Блицтен екі дүркін әлем чемпионы, рапидтен әлем біріншілігінің күміс жүлдегері, Азия чемпионы деген атағы бар қазақ қызы турнир барысында бірде-бір рет жеңіске жете алмады. Монакода Бибісара тоғыз кездесудің үшеуінде ұтылып, алты рет тең түсті. Нәтижесінде, небәрі 3 ұпай жиған ол ең соңғы 10-орында қалып қойды. Бұл жарыста Александра Горячкинаның бағы жанды. ФИДЕ-нің туы астында өнер көрсеткен 26 жастағы Ресейдің өкілі 5,5 ұпай жиып, бас жүлдені олжалады. Дәл сондай нәтиже көрсеткен үндістандық Хампу Конеру мен моңғолиялық Батхуяг Мунгунтуул екінші, үшінші орынды өзара бөлісті.
Осыған дейінгі екі кезеңнің қорытындысы бойынша Б.Асаубаева жарыс кестесінде көш бастап тұрған еді. Қоржынында 197,5 ұпайы бар ол екінші орынға сырғып түсті. Көш басына А.Горячкина шықты. Орынбор облысының тумасы 236,67 ұпайды еншіледі. Үздік үштікті қытайлық Тань Чжунъи (170 ұпай) түйіндеп тұр. Әлемдік Гран-при додасының төртінші кезеңі 14–25 наурыз аралығында Кипрде өтеді.
