Жеңістің 80 жылдығына орай Астанадағы Қарулы күштердің әскери-тарихи музейінде «Ұлы Жеңіс: Ерлікке – тағзым, ұрпаққа – үлгі» атты халықаралық сурет көрмесі ашылды. Көрмеге Қазақстан, Қырғызстан, Ресей елдерінің майталман суретшілерінің 100-ге жуық туындысы қойылған.
Олардың ішінде сұрапыл сұм соғысты бейнелеген туындылар, портреттік жұмыстар мен тарихи оқиғаларды суреттеген картиналар бар. Қазақтың батыр қыздары Әлия Молдағұлова, Мәншүк Мәметова, Хиуаз Доспанованың портреттік плакаттары да көрермен қауымға ерекше әсер сыйлайды. Іс-шараның ашылуына Мәжіліс депутаттары бастаған бір топ зиялы қауым өкілдері қатысты.
– Көрмеге қойылған картиналарды Суретшілер одағы мен Сурет академиясы жинақтаған. Біз музей тарапынан 15 картина қойдық. Негізгі мақсат – батырлар есімін ұлықтау, өнер арқылы жастарға әскери-патриоттық тәрбие беру, музей ісін дамыту. Бұл көрме бір айға жуық уақыт тұрады, келем деушілерге есігіміз ашық, кіру тегін, – деді Ұлттық әскери-патриоттық орталығы Әскери-тарихи музейінің басшысы Дәулет Қадыров.
Сонымен қатар көрмеге қатысқан суретшілер мен бірқатар ұйымдастырушылар арнайы сертификаттармен марапатталды.
– Туындыларға тек ұрыс даласындағы шайқас қана емес, оған дейінгі және одан кейінгі ауыр жылдар, майданнан баласын күткен ана, ауылдағы жағдай, тылдағы еңбек сияқты абстрактілі тақырыптар арқау болған. Бұл соғыстың бүгінгі әрбір азаматқа қатысы бар, көбіміздің аталарымыз, туыстарымыз осы соғыстан оралмай қалды, жаралы, мүгедек болып келді. Сондықтан Жеңіс мерейтойы қарсаңында өткізіліп жатқан халықаралық деңгейдегі көрменің мән-мағынасы зор, – дейді Астана қаласы Суретшілер одағы басқарма төрағасы, суретші-кескіндемеші Өмірәлі Исмаилов.
Жиын барысында келген қонақтарға елорданың мәдениет саласы қызметкерлерінің әскери-патриоттық тақырыптағы әндері де тарту етілді.
Жобаны ұйымдастырушылардың бірі, Суретшілер одағының басқарма мүшесі, кескіндемеші Мақсат Қаңтарбаев іс-шараның маңызына тоқталды.
– Менің әкем соғысқа қатысқан. Әкем секілді барша майданнан оралмаған батырларымызды еске алып, бүгін көрме ұйымдастырып отырмыз. Астанадан басталған көрмені Алматы, басқа да өңірлерде өткізу ойда бар. Бізді қолдаған Суретшілер академиясының президенті Амандос Ақанаевқа алғыс білдіреміз, – деді Мақсат Қырғызбайұлы.
