Сыбайлас жемқорлыққа қарсы іс-қимыл агенттігі Атырау облыстық департаментінің басшысы Ерұлан Серікқалиевтің айтуынша, құрылыс саласында алаңдататын түйткіл азаймай тұр. Ең бастысы – әлеуметтік нысандар мен жолдың құрылысын сапасыз жүргізу.
«Департамент қызметкерлері құрылысы ұзаққа созылған нысандарға талдау жүргізді. Талдау кезінде нысандар құрылысының кешігуіне себеп болатын бірнеше сыбайлас жемқорлық қаупі анықталды. Біріншіден, тапсырыс берушілер тарапынан тиісті бақылау жасалмайды. Екіншіден, техникалық қадағалау жоқ. Үшіншіден, мердігерлік компаниялардың мемлекеттік тапсырыс берушілермен үлестес болуы алаңдатады. Төртіншіден, мердігерлер арасындағы картельдік сөз байласу, жобалау-сметалық құжаттаманы түзету, қосымша бюджет қаржысын бөлу дерегі байқалды. Бесіншіден, тиісті лицензиясы жоқ мердігерлер жұмыстарды орындайды. Алтыншыдан, құрылыс жобаларына жауапты бұрынғы шенеуніктердің кейіннен келісімшарт жасалған мердігерлік мекемелерге жұмысқа орналасу дерегіне ерекше назар аударылды», дейді Е.Серікқалиев.
Облыстағы құрылысы кешіктіріліп, мерзімінде аяқталмаған нысандардың жартысынан көбі Атырау қаласында орналасқан – 48 нысан.
«Құрылысы кешіктірілген 81 нысанға 72 миллиард теңге бөлінгені анықталды. Осы кезге дейін 42,5 миллиард теңгеден астамы ғана игерілді. Нысандардың бәрінің әлеуметтік сала үшін маңызы зор. Оның ішінде 35 тұрғын үй, 32 инфрақұрылымдық нысан, 4 мәдениет үйі, 3 спорт кешені, 5 мектеп пен 2 аурухана бар. Әлеуметтік салаға серпін беретін нысандардың құрылысындағы ұзаққа созылған кідіріс қоғамның алаңдаушылығын тудырып отыр. Мұны сыбайлас жемқорлық қаупі мен жауапты органдардың әрекетсіздігінің ықтимал көрінісі ретінде бағалаған жөн», деп мәлімдеді департамент басшысы.
Оның айтуынша, жергілікті атқарушы органдарға анықталған сыбайлас жемқорлық тәуекелдерін жою үшін бірнеше ұсыныс беріліп отыр. Біріншіден, құрылысы аяқталған, бірақ түрлі себеппен қабылданбаған нысандарды анықтап, түпкілікті шешім қабылдау қажет. Екіншіден, келісімшартта көрсетілген міндеттемелерін орындамаған мердігерлерден тұрақсыздық айыбын өндіріп алуды жеделдеткен жөн. Үшіншіден, негізгі нысандардың құрылысын аяқтау үшін тендерлік рәсімдерді жүргізу керек. Төртіншіден, жосықсыз мердігерлерді тану туралы талап-арыздардың берілуін бақылау күшейтілуге тиіс.
«Біздің ұсыныстарымыздың тиімді тұстары бар. Біріншіден, бұл нысандар құрылысының кешіктірілуіне жол берілмейді. Екіншіден, бюджет қаржысын тиімді пайдалануды қамтамасыз етуге бағытталған. Осы кезге дейін мердігерлерден 69 миллион теңгеден астам тұрақсыздық айыбы өндірілді. Жосықсыз компаниялар арнайы тізілімге енгізілді. Заң бұзушылықтарға жол берген шенеуніктерді жауапкершілікке тарту шаралары қабылданды», дейді Е.Серікқалиев.
«Мемлекет басшысы ұсынған «Заң мен тәртіп» қағидатын іске асыру, маңызды әлеуметтік нысандар құрылысының уақтылы аяқталуын бақылау мақсатында мониторинг жүргізілді. Мәселен, Мұқыр ауылдық округінде мәдениет үйі 400 орынға есептелген. Бұрын құрылысқа 2 мердігер тартылды. Алайда екеуі де жұмысты мерзімінде тапсыра алмады. Аталған нысандағы түйткіл бірінші мердігердің шартта көзделген міндеттерді тиісті деңгейде орындамай, қаржылық қиындыққа байланысты құрылысты тастап кетуінен туындады. Екінші мердігермен жасалған шарттың заңдылығы тұрғысынан сот процесі жүргізіліп жатыр», деп мәлімдеді департамент басшысының бірінші орынбасары Нұрлан Жахин.
Оның дерегіне қарағанда, нысан жобасына түзетулер енгізілген. Сөйтіп, 2024 жылғы 5 шілдеде жаңа мердігер – «Жиенбай» ЖШС-мен мемлекеттік сатып алу шарты жасалған. Қазір мәдениет үйі құрылысының 27%-ы ғана орындалған.
Осы кезге дейін бағаналарды құю аяқталған. Енді еден плитасының қалыптарын монтаждау жүріп жатыр.
Атырауда құрылысы ұзаққа созылған нысандардың қатарында Талқайраң ауылындағы жаңа шағын ауданның құрылысы да бар. Облыс әкімінің баспасөз хатшысы Руслан Жұмағазиев берген деректерге сүйенсек, Атырау қаласының бас жоспарына сәйкес, көпқабатты тұрғын үйлер салуға мұнайлы шаһар маңындағы елді мекеннен 62 гектар жер телімі бөлінген. Содан соң тұрғын үйлер құрылысының жоспары жасақталған.
«Соған сәйкес 70 тұрғын үй салу жоспарланған. Оның ішінде 1 080 пәтерлік 24 тұрғын үйдің 2019 жылы құрылысы басталған еді. Үйлердің аумағы 56 мың 323 шаршы метрді құрайды. Қазір 8 үйдің құрылысы толық аяқталды. Тұрғын үйлерді инженерлік-коммуникациялық жүйелердің құрылысы тиянақталған соң қолданысқа беру жоспарланып отыр», деп хабарлады Р.Жұмағазиев.
Спутник қалашығы аумағында магистралдық электр желісі бар 110/10 кВт қосалқы станса құрылысы аяқталды. Алаңнан тыс аумақта электр желісі тартылған. Қазір 24 тұрғын үйде алаңішілік электр желісін тарту жұмысының 90%-ы атқарылыпты. Жаңа шағын ауданда магистралдық газ құбырының құрылысы АГРС қондырғысымен қоса жүріп жатыр. Газ жеткізу құбырының, алаңнан тыс газ желісін электрмен қамту құрылысы аяқталып тұр. Құрылысы аяқталуға жақындаған 24 тұрғын үйді газбен қамтитын желінің құрылысы да бітті. Мұнда ұзындығы 9,3 шақырым магистралдық су құбырын тарту жұмыстары жүріп жатыр. Су құбырының дайындығы – 95%.
«Тұрғын үйлерге су және кәріз құбырын жеткізу нысанының құрылысы аяқталды. Ұзындығы 22 шақырым магистралдық кәріз желісінің құрылысы басталды. Қайыршақты ауылдық округіне қарасты ауылдар аталған кәріз желісіне қосылуына байланысты жобалау-сметалық құжаттамаға түзетулер еңгізіліп жатыр. Осы айда жобаға мемлекеттік сараптаманың қорытындысы алынады», дейді облыс әкімінің баспасөз хатшысы.
Алайда жаңа шағын ауданда жылу желісін жүргізу әлі толық аяқталмай отыр. Мәселен, қуаты сағатына 99 гкал құрайтын қазандықтың құрылысына байланысты жобалау-сметалық құжаттамасы жасақталып, сараптамадан өткізуге жіберілген. Жылу жеткізу желісі құрылысының 25%-ы орындалды. Алаңнан тыс жылу желісін жүргізу аяқталды. Aлаңішілік жылу желісінің 75%-ы жүргізілген. Қазір автокөлік жолы мен абаттандыру жұмысы қоса атқарылып жатыр. Шағын аудандағы №1, №4 көшеден басқасында астыңғы ірі қабатты асфальт салынды. Жолдың дайындығы – 60%.
«Магистралдық байланыс желісінің 70%-ы дайын тұр. Үйаралық байланыс желісін жүргізуге жер қазу жұмысы кедергі келтірді. Соған байланысты жұмыс уақытша тоқтатылды», деп мәлімдеді баспасөз хатшысы.
Атырау облысы
