Былтыр жазушы Төкен Әлжантегінің «Қызықтың бәрі ауылда» шығармасы «Айбоз» ұлттық әдеби сыйлығының «Үздік балалар әдебиеті» аталымында жеңімпаз атанған еді. Мінеки, жас өскіндерді тағы бір кітабымен қуантып отыр.
Жазушы Сүйіндік Жанысбай, балалар кітапханасының басшысы Баян Қуанышқызы салтанатты түрде жаңа кітаптың тұсауын кесіп, жылы лебіздерін білдірді.
Сүйіндік Жанысбай кездесу қонағының шоқтығы биік шығармаларына тоқталып, жаңа кітаптың жас оқырман үшін таптырмас тәрбие құралына айналатынына сенім білдірді. Сөйтіп, өзінің де жақында шыққан «Алтын тостақ» атты ертегілер кітабын тарту етті.
«Кітапхана қорында балаларға арналған сапалы, түрлі түсті кітаптар көбейген сайын оқырман саны да артады. Себебі кітапханаға алғаш келген бала қызылды-жасылды, әдемі безендірілген кітапқа қол созады. «Базарлық» кітабы балалардың талғамына сай шыққан. Кітапхана қорының осындай кітаппен толыққанына өте қуаныштымыз», деген кітапхана басшысы Баян Қуанышқызы ұжым атынан Алғысхат пен Абайдың бюстін сыйлады.
Шәкірттері атынан сөз алған қаламгердің қарындасы Салтанат Смағұлтегі жазушыға қолсағат, қаламгердің жарына қазақтың жөн-жоралғысымен орамал сыйлады.
Кешке жазушының туған жері Жаңаарқадан да меймандар келіпті. Қаламгердің ел аузында жүрген «Жаңаарқа вальсі» әнін Мейрамгүл Кәріпжанова шырқады.
Жас оқырмандар жазушыға шығармашылығы, жаңа кітабы жөнінде түрлі сұрақ жаудыртты. Қаламгер де сүйікті оқырмандарын сағынса керек, әр сауалға жүйелі жауап қайырып отырды. Осылайша, жас оқырмандармен емен-жарқын әңгіме кештің соңына жеткенін де сездірмеді.
Қарағанды облысы
