25-30 сәуір аралығындағы есеп бойынша, ең көп анкета Ақмола облысынан түскен – үш күн ішінде бұл өңірден 276 өтініш келіп түсті. Жамбыл (108 анкета), Алматы (9 анкета), Ақтөбе (42 анкета), Атырау (21 анкета) және Шығыс Қазақстан облысы (34 анкета) да – белсенділік танытқан өңірлер қатарында. Ал Шымкент, Абай және Ұлытау облыстарынан әзірге ақпарат келіп түспеген. Сонымен қатар Ресей Федерациясынан – 49, Украинадан – 12, Беларусь пен Қырғызстаннан бірнеше анкета қабылданған. Жалпы есеп бойынша портал арқылы 793 анкета тіркеліп, сайтқа енгізіліпті.
Естеріңізге сала кетсек, жуырда майдангерлерді еске алуға арналған «Батырларға тағзым» (batyrlarga-tagzym.kz) атты жаңа портал жұмысын бастаған-ды. Яғни «Батырларға тағзым» – Екінші дүниежүзілік соғыс ардагерлерінің есімін ұлықтау бағытында еліміздің контент кеңістігіне қосылған жаңа онлайн-платформа. Бұл бастаманы Мәдениет және ақпарат министрлігі Жеңістің 80 жылдығына орай қолға алып отыр.
Жобаның басты мақсаты – соғыста ерлікпен шайқасқан отандық жауынгерлер туралы мәліметтерді жинақтап, жас ұрпаққа жеткізу. Қазіргі таңда портал базасында 677 мыңнан аса ардагер туралы дерек бар. Олардың ішінде 365 Кеңес Одағының батыры, 4 екі мәрте Батыр атанған жауынгер, 19 «Даңқ» орденінің иегері бар. Ал мәліметтер қоры күн санап толығып келеді.
Елордада өткен ардегерлер пленумында Мәдениет және ақпарат министрі Аида Балаева портал мақсатына аз-кем тоқталып, пікір білдірген еді.
– Екінші дүниежүзілік соғысы ардагерлеріне қатысты мәліметтерді біріздендіру мен халықтың ақпаратқа қолжетімділігін қамтамасыз ету мақсатында «Батырларға тағзым» порталының қызметі кеңейтіледі. Порталда Қазақстанның жауынгерлері туралы деректер мемлекеттік архивтер мен Қорғаныс министрлігінің мәліметтері негізінде орналастырылған, – деді А.Балаева.
Сондай-ақ министр жуырда өзінің «Facebook»-тегі парақшасында да аталған платформа туралы толығырақ мәлімет жариялады. А.Балаева порталда кең көлемді мәліметтер базасы жинақталғанын атап өтті.
«Интерфейс қажетті ақпаратты табуға ғана емес, сонымен қатар өз ардагер туыстары туралы деректерді қосуға, жаңалықтармен танысуға мүмкіндік береді. Осылайша, бұл портал тарихты болашақ ұрпақ үшін сақтап, батырларға тағзым етіп, құрмет көрсетуге арналған платформа қызметін атқарады», деді министр.
Жоба авторлары сайттың ыңғайлы әрі интерактивті болуына баса мән берген. Қолданушылар өз туыстарының майдан жолын сипаттайтын мәліметтерді енгізе алады, фотосуреттер мен құжаттарды жүктейді және басқа ардагерлер туралы толық ақпаратпен таныса алады. Сондай-ақ жаңалықтар бөлімінен Жеңіс күніне орай атқарылып жатқан іс-шаралар туралы оқи алады.
