Шараға Ұйғыр ауданының әкімі Бота Елеусізова, Алматы облысы мәдениет, архивтер және құжаттама басқармасының басшысы Данияр Әлиев, Мұқағали Мақатаевтың ұлы Жұлдыз Мақатаев пен Илья Молотовтың туған бауыры Сунят Палтушаев, сонымен бірге Алматы облысының Құрметті азаматы, ардагер Ызғарбек Бектұрсынов, ақын, драматург Бақыт Беделхан қатысты.
Салтанатты жиында сөз алған меймандар Мұқағали мен Ильяның достығын, қос ақынның поэзия мен руханият жолындағы ұлы миссиясын ерекше атап өтті. Достық пен бірлікті және рухани үндестікті айқындаған мәдени шарада ескерткіштің лентасы қиылып, гүл шоқтары қойылды.
Бұдан кейін Қарадала халық театрының қатысуымен «Досым, саған айтамын...» атты шағын пролог қойылып, Мұқағали мен Илья бейнелері көрерменнің жүрегін тебірентті.
Қос ақынның ажырамас достығы туралы аз айтылмаған. Олар Мәскеуде бірге оқып, одан кейінгі жылдарда да айнымас досқа айналғаны ақиқат. Сол себепті, қос ақынға Қарадала төрінен еңселі ескерткіш қою көптен бері көтеріліп келген. Бұл ескерткіш – поэзияға, адал достық пен бауырластыққа қойылған тағзым, болашақ ұрпақ үшін рухани мұра саналады.
Алматы облысы.
