Фото: gov.kz
Иван Поворознюк 1921 жылы Қостанай облысы Введенский ауданы Алешинка ауылында дүниеге келген. Ол 1941 жылы сәуірде әскерге шақырылып, 1942 жылдың наурызынан бері хабарсыз кетті. Тек бірнеше онжылдықтардан кейін ғана норвегиялық зерттеушілер мен Қазақстанның Норвегиядағы Елшілігінің күш-жігерінің арқасында оның тағдыры мен қаза тапқан жері анықталған.
Мемориал жергілікті тұрғын Пер-Коре Холдал басқарған топтың бастамасымен және Қазақстанның Норвегиядағы Елшілігінің белсенді қатысуымен салынды.
Мемориалдың ашылу салтанатына жергілікті билік басшылығы, қоғам өкілдері, Қазақстанның Норвегиядағы Елшісі Әділ Тұрсынов, сондай-ақ қаза тапқан қазақстандық жауынгердің туысы – Лариса Кушнарёва қатысты.
Бұл оқиға екі ел халықтарының арасындағы достықтың тағы бір дәлелі болды.
Айта кетейік, Екінші дүниежүзілік соғыс кезінде оккупацияланған Норвегиядағы концлагерьлерде 15 мыңнан астам кеңестік әскери тұтқындар қаза тапты. Соңғы жылдары Қазақстан Елшілігі 1941-1945 жылдары Норвегияда жерленген 74 қазақстандық жауынгердің есімін анықтады.
