- Бангкокта өтіп жатқан «Thailand Open-2025» турнирінің үшінші күні тағы бірнеше боксшымыз шаршы алаңға шықты. Күндізгі сессияда Оразбек Асылқұлов (60 кг) жергілікті былғары қолғап шебері Тханпхансакон Каласирден ұтылса, Назерке Серік (65 кг) Танаи Сомнуекке жол берді. Данияр Рақымбердиев (90 кг) украиналық Евгения Павловскийді жеңді. Кешкі бағдарламада Төрехан Сабырхан (70 кг) филиппиндік Рональд Чавеске шаң қаптырса, Виктория Графеева (60 кг) сингапурлық Занн Чиге сан соқтырды. Даниял Сапарбай (+92 кг) үндістандық Аншул Гиллге есе жіберді.
- Францияның Сен-Моресінде шымылдығы түрілген Әлем кубогінің кезеңдік сайысында еліміздің семсерлесушілері сәтсіз өнер көрсетті. Шпагашылардың бәсекесінде ең үздік нәтижеге Руслан Құрбанов қол жеткізді. Ол 17-орынды қанағат тұтты. Командалық жарыста жерлестеріміз 13-сатыға табан тіреді.
- 28–31 мамыр аралығында Өзбекстанның бас шаһарында үстел теннисінен жас өрендер арасында «WTT Youth Contender Tashkent 2025» халықаралық турнирі өтеді. Аталған додада Аустралия, Әзербайжан, Грузия, Үндістан, Иран, Қазақстан, Оңтүстік Корея, Қырғызстан, Малайзия, БАӘ, Ресей, Сауд Арабиясы, Тәжікстан, Түрікменстан, Өзбекстан құрамалары бақ сынайды. Ташкент төрінде еліміздің намысын 67 ойыншы қорғайды. Олардың қатарында Алан Құрманғалиев, Жәния Бекмұхамбетова, Әлбина Жақсылықова, Назерке Болатбек, Шохина Миркодирова, Дагир Данияров сынды танымал спортшылар бар.
