Сурет: politic.kz
Цифрлық төлқұжат ветеринарлық клиникаға барғанда, саяхат кезінде, көрмеге қатысқанда немесе жануарыңыз жоғалған жағдайда жедел ақпарат ұсынуға өте ыңғайлы болмақ. Сонымен қатар бұл жүйе қаңғыбас жануарлар санын азайтуға және иелерінің жауапкершілігін арттыруға көмектеседі. Наурыз айындағы мәлімет бойынша жүйеде 224 мыңнан астам үй жануары тіркелген, оның ішінде 20 мыңнан астамы – иесіз жануарлар.
Цифрлық паспортта бірнеше мәлімет қамтылады. Атап айтсақ, жануардың жеке нөмірі, аты, түсі, тұқымы, туған күні, ерекше белгілері, жануардың түрі мен жынысы, тіркелген әрі нақты тұратын мекенжайы, иесінің толық аты-жөні мен ЖСН, сондай-ақ чиптеу, стерилизация, вакцинация туралы ақпараттар цифрлық паспортта толық жазулы тұрады.
Қызметті пайдалану үшін ең әуелі «eGov Mobile» қосымшасына кіріп, авторизациядан өту қажет. Содан соң «Цифрлық құжаттар» сервисін ашып, «Басқа құжаттар» бөлімінен жануардың паспортын табуыңыз керек. Егер құжат көрінбесе, «Құжаттарды жаңарту» батырмасын басыңыз.
Жаңа сервис Цифрлық даму, инновациялар және аэроғарыш өнеркәсібі министрлігінің бастамасымен, «Ұлттық ақпараттық технологиялар» АҚ және Экология министрлігімен бірлесе отырып іске қосылған.
