Суретті түсірген – Ақәділ Рысмахан
Жергілікті атқарушы билік өкілдері келтірген дерекке жүгінсек, индустриялық жобаны қаржыландыруға жергілікті кәсіпкер тәуекел еткен екен. Ол осы жобаны сәтімен жүзеге асыру үшін ынты-шынтысымен іске кірісіп кетті.
Облыс орталығы Тараз қаласынан таяқтастам жерде орналасқан жаңа зауыттың құрылтайшысы Жамалхан Ибрагимовтің айтуынша, шыңдалған шыны шығаратын кәсіпорын жергілікті 40 азаматты тұрақты жұмыс орнымен қамтып отыр. Бастапқыда 1 млрд теңге көлемінде инвестиция салынған зауыт жылына 100 мың шаршы метр шыңдалған шыны өндіруге қауқарлы. Кәсіпорын өніміне жергілікті тұтынушылар ғана емес, көршілес өңірлердің азаматтары да қызығушылық танытқан.
«Мемлекет басшысы Қасым-Жомарт Тоқаевтың инвестициялық жобаларды қолдау арқылы өңірлерде жаңа өндіріс орындарын құру жөніндегі тапсырмасы назарымыздан тыс қалмақ емес. Қазіргі кезде облыс аумағында жаңа кәсіпорындар ашу бойынша қарқынды жұмыс жүргізіліп жатыр.
Бірнеше күн бұрын тоғыз жолдың торабында орналасқан Шу қаласында жылына 1 500 локомотив жөндеуге әлеуеті жететін техникалық қызмет көрсету депосы ашылды. Президент тапсырмасын жүзеге асыру мақсатында қолға алынған жұмыс аз емес. Жаңа жобалардың барлығын сәтімен орындау үшін жергілікті атқарушы билік өкілдері қолдан келгенше еңбек етіп жатыр.
Бүгін іске қосылған шыңдалған шыны өндіретін зауыт – өңірде атқарылып жатқан ауқымды жұмыстың нақты бір көрінісі. Бұл кәсіпорын – өңір экономикасының өркендеуіне, жергілікті халықтың әлеуметтік жағдайын жақсартуға бағытталған маңызды жобалардың бірі.
«Туған жерге туыңды тік» деген халық даналығының мәні тереңде жатыр. Осы қағиданы ұстанып, туған жерге инвестиция салып, жаңа іс бастаған іскер азаматтарға алғыстан басқа айтарымыз жоқ. Өндіріс ошағын ашқан азаматтардың бастамасы баянды болатынына сеніміміз зор», дейді өңір басшысы Ербол Қарашөкеев.
Ресми дерекке сүйенсек, жобаны «Js Glass» ЖШС жүзеге асырыпты. Зауыт басшылары өндірілген өнімнің сапасы мен қауіпсіздік талаптарына айрықша назар аударып отыр. Сондай-ақ құрылтайшылар кәсіпорын өнімін, ішкі нарықты қамтып қана қоймай, көршілес жатқан Алматы, Түркістан облыстарының нарығына шығаруды да жоспарлап отыр.
«Кәсіпорын қызметкерлері заманауи үлгідегі қондырғылармен жұмыс істейді. Қытай елінен келген кәсіби мамандар бір ай бойы білгенін үйретті. Соның арқасында біз де жаңа құрылғыларды бір кісідей меңгеріп алдық. Ауылымызда жаңа зауыттың ашылғаны көңіл қуантады. Енді тек адал жұмыс істеп, өңір экономикасының өркендеуіне күш салуымыз керек», дейді шыңдалған шыны шығаратын зауыт қызметкері Дастан Абделиев.
Жалпы алғанда, Жамбыл облысында ілкімді жобаларды жүзеге асыру бойынша біршама жұмыс атқарылып жатыр. Ірі жобаларды кезең-кезеңімен іске асыру мақсатында қолға алынған жұмыс ілкі сәтке де тоқтамақ емес.
Облыстық кәсіпкерлік және индустриалды-инновациялық дамыту басқармасының басшысы Аспандияр Сейсебаевтың айтуынша, биыл «Alit Holding» ЖШС жылдық қуаты 150 мың тоннаны құрайтын құрғақ құрылыс қоспаларын өндіретін кәсіпорынды іске қосуға ниеттеніп отыр. Сондай-ақ «Кнауф Гипс Тараз» ЖШС жылына 22 миллион шаршы метр гипсокартон өндіретін кәсіпорын құрылысын бастамақ.
Бұдан бөлек, «Qazaq soda» компаниясы жылына 1 миллион тонна кальцийлендірілген сода өндіретін зауыт құрылысын жүргізіп жатыр. Өндіріс ошағы 2027 жылы іске қосылады. Сонымен қатар «Talas Investment Company» компаниясының
натрий цианидін өндіру жобасының екінші кезеңі жүзеге асатын күн де алыс емес. Сол арқылы жылына 30 мың тонна натрий цианидін өндіру мүмкін болмақ.
Қалай десек те, өңірде инновациялық жобаларды іске асыру жөнінде атқарылып жатқан жұмыс аз емес. Біз солардың бір парасын ғана тілге тиек етіп отырмыз. Жергілікті атқарушы билік өкілдері Президент тапсырмасын лайықты орындау арқылы жергілікті халықты жаңа жұмыс орнымен қамтуға басымдық беріп отыр.
Жамбыл облысы,
Байзақ ауданы
