Жеңісті жолды Даниял Сәбит (50 кг) бастап, моңғол Алдархишиг Батулгадан басым түсті. Көп кешікпей рингке Абылайхан Жүсіпов көтерілді. Әлем чемпионатының үш дүркін қола жүлдегері тым күшті қарсыласқа тап болды. Өзбекстанның үкілеген үміті Асадхуджа Муйдинхуджаев 2023 жылы Ташкентте әлем чемпионы, былтыр Парижде Олимпия ойындарының жеңімпазы атанды. Екі саңлақ бірден ашық айқасқа барды. Екінші раундта Абылайханның қабағы жарылды. Дәрігерлер жерлесімізге жекпе-жекті жалғастыруға рұқсат бермеді. Ережеге сай дәл сол сәтке дейін кімнің ұпайы көп болса, жеңіс соның еншісіне жазылады. Бұл ретте А.Жүсіповтің жолы болды.
Ерасыл Жақпеков (80 кг) пен Дәулет Төлемісов (80 кг) Украинаның өкілдерімен қолғап түйістірді. Бұл бәсекелерде біздің жігіттердің басымдығы анық байқалды. Ерасыл Артур Касьяновты оңай еңсерсе, Дәулет Микола Лактионовқа адым аштырмады. Алыптардың айқасы Нұрлан Сапарбайдың (+90 кг) жарқын жеңісімен аяқталды. Кездесу барысында германиялық Денис Охьоны екі рет нокдаунға жіберген жампозымыз бас жүлдені қанжығасына байлады. Ертуған Зейнуллинов (65 кг), Сабыржан Аққалықов (75 кг), Сағындық Тоғамбай (90 кг) қола медальды еншіледі.
Сөйтіп, қызғалдақтар елінде жалауы желбіреген жарыста 5 алтын, 3 қола медаль олжалаған еліміздің ұлттық құрамасы жалпы командалық есепте жеке-дара көш бастады.
