Жартылай финалда Улрике Эйкери (Норвегия)/Эри Ходзумиді (Жапония) жолдарынан ығыстырды. Финалда үздіктер тізімінде екінші орында тұрған Италияның қос мықтысы – Жасмин Паолини/Сара Эррани жұбымен шеберлік байқасты. Бұл бәсекеде Апеннин түбегінен келген арулардың асығы алшысынан түсті – 6:4, 2:6, 6:1.
Әйелдер сайысы АҚШ-тың өкілі Кори Гауффтың жеңісімен аяқталды. Финалда ол беларусьтік Арина Соболенкоға 6:7, 6:2, 6:4 есебімен сан соқтырды. Оның алдында америкалық теннисші Оливия Гадеки (Аустралия), Тереза Валентова мен Мари Боузкова (Чехия), Екатерина Александрова (Ресей), Мэдисон Киз (АҚШ), Лоис Буассоннан (Франция) басым түсті.
Ерлер арасындағы бәсекенің бас жүлдесін италиялық Янник Синнер мен испаниялық Карлос Алькарас өзара сарапқа салды.
5 сағат 29 минутқа созылған сайыс Пиреней түбегі түлегінің пайдасына шешілді. Бұл – «Ролан Гарростың» рекордтық көрсеткіші. Жеңімпаз бас бәсекеге дейін Дулио Цеппери, Лоренцо Музетти (Италия), Фабио Марожан (Мажарстан), Дамир Джумхур (Босния мен Герцеговина), Бен Шелтон, Томми Полдан (АҚШ) айласын асырды. Сөйтіп, Алькарас «Үлкен дулыға» санатындағы турнирлердегі жеңістер санын беске жеткізді.
Жекелеген сайыста еліміздің теннисшілері арасынан Александр Бублик жақсы өнер көрсетті. АТР рейтингінде 62-орында тұрған отандасымыз аустралиялық Джеймс Дакворт (АТР №92), Алекс де Минаур (№9), португалиялық Энрика Роша (№200), ұлыбританиялық Джек Дрейперді (№5) жеңіп, ширек финалға шықты. Бірақ бұл межеде әлемнің бірінші ракеткасы, италиялық Янник Синнерден аса алмады.
