Фото: Ашық дереккөз
Еңбек және халықты әлеуметтік қорғау министрлігің мәліметінше, субсидияланатын жұмыс орындарына мансап орталықтары арқылы 116,2 мың адам жіберілген. Оның ішінде:
- Әлеуметтік жұмыс орындарында – 10,8 мың адам,
- Жастар практикасында – 7,8 мың адам;
- Қоғамдық жұмыстарда – 83,3 мың адам;
- «Күміс жас» жобасы аясында – 12,8 мың адам;
- «Алғашқы жұмыс орны» жобасы бойынша – 1,4 мың адам;
- «Ұрпақтар келісімшарты» жобасы шеңберінде – 59 адам жұмыспен қамтылды.
Сонымен қатар еңбек нарығында сұранысқа ие дағдыларды меңгерту мақсатында онлайн оқытуға 42 мың жұмыссыз тартылып, оның ішінде 39,4 мыңы оқуды аяқтаған. Сондай-ақ «Бастау Бизнес» жобасы аясында кәсіпкерлік негіздеріне оқыту бағдарламасына 26,6 мың адам қатысып, олардың 14,4 мыңы оқуды сәтті аяқтап, сертификаттарға ие болған.
Министрліктің хабарлауынша, жұмыс берушілердің сұранысы бойынша кәсіптік оқытуға 1 687 адам жолданды. Олардың 89-ы оқуды аяқтап, 83 адам немесе 93,3%-ы жұмысқа орналасты. Қызмет саласын анықтауға көмектесу мақсатында 176,4 мың адам кәсіптік орталықтарда әлеуметтік кәсіптік бағдарлаудан өтіп, кеңес беру қызметтерін алды.
Бұдан бөлек, азаматтарды жұмысқа орналастыру бірнеше бағыт бойынша жүзеге асырылатынын және нақты жұмысқа орналасу міндетті зейнетақы жарналарының аударылуымен расталатынын атап өткен жөн. Атап айтқанда, 2025 жылғы 1 маусымдағы дерек бойынша:
- Халықты жұмыспен қамтуға жәрдемдесудің белсенді шаралары шеңберінде – 100 мың адам;
- Электрондық еңбек биржасында жұмыс берушілер ұсынған бос орындар арқылы – 44,7 мың адам;
- Мемлекет басшысының «10 мың тұрғынға 100 жұмыс орны» бастамасы аясында – 44,8 мың адам;
- Орталық мемлекеттік органдардың жобалары арқылы – 1,1 мың адам жұмысқа орналасты.
«Сонымен қатар, жаңа бизнес-бастамаларды қолдау мақсатында 2025 жылы халықтың әлеуметтік осал санаттарына 400 АЕК (1 572 800 теңге) көлеміне дейін 9 мың грант беру жоспарланған. Осыған байланысты, 2025 жылғы 21 мамыр мен 3 маусым аралығында «Business.Enbek» порталында грант алуға үміткерлерден өтінім қабылдаудың бірінші легі жүзеге асырылды. Нәтижесінде барлығы 11 479 өтініш тіркелді», делінген хабарламада.
