- Парижде жеңіл атлетикадан «Гауһар лигасының» кезекті кезеңі мәреге жетті. Жарыста елімізден бір ғана спортшы, Надежда Дубовицкая өнер көрсетті. Жерлесіміз биіктікке секіруде 178 сантиметрлік нәтижемен 13-орында қалып қойды. Бұл бәсекеде аустралиялық Никола Олислагерсе алдына жан салмады. Күміс пен қола медальды украиналық Ярослава Магучих (197 см) пен жасыл құрлықтың тағы бір өкілі Элинор Паттерсон (197 см) иеленді.
- Кеше Хорватияның Загреб қаласында үстел теннисінен «WTT Contender Zagreb» атты ірі халықаралық турнирі басталды. Осы жарысқа әлемдік рейтингте жоғары орында тұрған Томокази Харимото (Жапония, ITTF рейтингінде 4-орын), Сян Пэн (Қытай, 9), Дарко Йоргич (Словения, 10), Бенедикт Дуда (Германия, 11), Ан Джэхён (Оңтүстік Корея, 17), Ох Джунсунг (Оңтүстік Корея, 19) сынды саңлақтар қатысады. Қазақ елі намысын Дастан Кенжеғұлов, Айдос Кенжеғұлов, Санжар Жұбанов қорғайды.
- Лозаннада Халықаралық Олимпиадалық комитеті (ХОК) президентінің өкілеттігін табыстау рәсімі өтті. 2013 жылдан бері осы ұйымды басқарып келген Томас Бах өз өкілеттігін Кирсти Ковентриге ресми түрде тапсырды. ХОК-тің жаңа басшысы 1983 жылы Зимбабведе дүниеге келді. Жүзуден Олимпия ойындарында 7 (2 алтын+4 күміс+1 қола), әлем чемпионаттарында 8 (3+5+0) рет жеңіс тұғырына көтерілді. Мансабын аяқтағаннан кейін Ковентри ханым Зимбабвенің Жастар, спорт, өнер және демалыс министрі, ХОК-тің атқару комитетінің мүшесі, ұйымның спортшылар комиссиясының төрағасы қызметтерін атқарды.
- Ұлыбританияда «Уимблдонның» іріктеу сайыстары басталды. Бұл жарыста еліміздің төрт теннисшісі бақ сынап, үшеуі келесі кезеңге өтті. Тұсаукесер кездесулерінде Тимофей Скатов италиялық Стефано Наполитаноны (АТР№684), Михаил Кукушкин бразилиялық Тьяго Уайлды (№120), Бейбіт Жұқаев украиналық Виталий Сачконы (№213) ұтты. Дмитрий Попко аргентиналық Роман Андрес Бурручадан (№133) жеңілді. Ал әлемдік рейтингте ТОП-100-діктің қатарындағы Александр Бублик пен Александр Шевченко, Елена Рыбакина мен Юлия Путинцева турнирдің негізгі бөлігіне бірден жолдама алды.
- Теннисшілердің әлемдік рейтингі қайта жаңартылды. Галледегі додада небір мықты қарсыласты қапы қалдырып, бас жүлдені олжалаған Александр Бублик бірден 15 сатыға жоғарылап, қазіргі кезде 30-орында тұр. Александр Шевченко 97-орнын сақтап қалды. АТР тізімінде италиялық Янник Синнер көш бастап тұрса, оны испаниялық Карлос Алькарас, германиялық Александр Зверев, ұлыбританиялық Джек Дрейпер, сербиялық Новак Джокович өкшелеп келеді.
Әйелдер арасында беларусьтік Арина Соболенко алдына жан салар емес. Одан кейінгі орындарға АҚШ-тың қос үздігі – Коко Гауфф пен Джессика Пегула, қытайлық Чжэн Циньвэнь, ресейлік Мирра Андреева тұрақтады. Қазақстанның бірінші ракеткасы Елена Рыбакина 11-сатыда, Юлия Путинцева 33-орында тұр. Испаниядағы турнирде топ жарғаннан кейін Зарина Диас WTA-дағы жағдайын біраз жақсартып алды. Жерлесіміз осы аптада
28 сатыға жоғарылап, бұл күндері 246-орынды иеленіп отыр.
