Еуразиялық даму банкі кеңесінің басқосуы

Отырыста ЕАДБ басқарма төрағасы Николай Подгузов 2022–2026 жылдарға арналған стратегияның негізгі көрсет­кіштері туралы баяндады. 2024 жылдың қорытындысында жинақ­талған инвестициялық портфель 16,5 млрд доллар дең­гейіне жетті, инвестиция­лар көлемі өткен жылмен салыс­тыр­ғанда 700 млн долларға ұлға­йып, 2,4 млрд доллар болды.  Орнық­ты даму саласындағы мақсаттарға қол жеткізуге қосқан үлесі бар жобалардың үлесі 30%-дан асты, бұл нысаналы көрсеткіштерден екі есе көп. ЕАДБ техникалық қолдаудың жобалық портфелін айтарлықтай ұлғайтты. Былтыр бұл көрсеткіш 76%-ға өсіп, тарихи ең жоғары деңгейге жетті.

Басқарманың жылдық есебі­не сәйкес банктің Қазақстан­дағы инвестициялық портфелі 7,2 млрд долларға жетті, оған 116 жоба, оның ішінде құны  2,9 доллар млрд 43 жоба бар. Сон­дай-ақ Армения, Қырғызстан және Тәжікстандағы бастамаларына инвестициялардың өсуі де тілге тиек етілді. Биыл ЕАДБ-ның жинақталған портфелінде барлығы 305 жоба бар.

Бірінші жартыжылдық­тың қорытындысында  биылға арнал­ған инвестициялар жоспар  орындалып, 2,1 млрд долларды құрады. Дайындыққа баса мән берілген жобалардың әлеуетті көлемі 4 млрд доллардан асады.

ЕАДБ құру туралы келісімге Өзбекстан ресми түрде қосылды. Отырыс барысында Өзбек­­станның инвестициялар, өнер­кәсіп және сауда министрі Лазиз Кудратов банкпен белсенді өзара іс-қимылға дайын екенін жеткізді.

Отырыс қорытындысында  ұйым­дастырушылық әрі  қаржы­лық сипаттағы шешімдер қабыл­данды. Кеңес мүшелерінің ұсы­ны­сы­мен Премьер-министр Олжас Бектенов ЕАДБ Кеңесінің төр­аға­сы болып сайланды. Төр­аға­ның орынбасары болып Қар­жы ми­нистрі Мәди Такиев тағайындалды.

Еуразиялық даму банкі — еура­зия­лық кеңістікте инвес­ти­циялық қызметті жүзеге асыра­тын көпжақты даму банкі. ЕАДБ портфеліндегі негізгі үлесі көлік инф­рақұрылымы, цифрлық жүйелер, жасыл энергетика, ауыл шаруашылығы, өнеркәсіп пен машина жасау салаларындағы интеграциялық жобаларға арналады. Банк БҰҰ-ның Орнықты даму саласындағы мақсаттарын және ESG қағидаттарын басшылыққа алады. ЕАДБ 2022–2026 стратегия­сы шеңберінде «Орталық Азия­ның су-энергетикалық кешені», «Еура­зияның көлік негізі», «Еуразиялық тауар өткізу желісі» сынды 3 мегажобаны жүзеге асырады.