Зияткерлік бәйгенің жеңімпаздары

Жас физиктер

Ұлттық құрама жақында Францияның Палезо қала­сында өткен IPhO-2025 халық­аралық физика олимпиадасында бес медаль жеңіп алды.

Биылғы сайысқа 90 елден 400-ден астам дарынды оқушы қатысқан. Жас физиктеріміз бұл жолы да үздіктер қатарынан көрініп, екі күміс, үш қола медальды олжалап қайтты. Тарқатып айтсақ, Астана қаласындағы Назарбаев зияткерлік мек­тебінің 11-сынып оқушысы Әмірбек Азатбеков пен Ал­маты қаласындағы Назарбаев зият­керлік мекте­бінің 12-сынып оқушысы Бека­сыл Елу­бай екінші орын алса, Астана қаласындағы «Spectrum» халықаралық мекте­бінің 12-сынып оқу­шысы Әмір Пішенбаев, Аста­на қала­сын­дағы Nurorda мек­теп-ли­цейінің 10-сынып оқ­у­шы­сы Нұргүл Егенбер­генова және Астана қаласын­дағы «Spectrum» халықаралық мекте­бінің 12-сынып оқушысы Артур Ким үшінші орынның тұғы­рынан көрінді.

Команданың ғылыми жетекшілері – PhD докторы, Сулейман Демирель университетінің ассистент-профессоры Самат Мақсұ­тов және халықаралық олим­пиадалардың жүлдегері Алишер Еркебаев.

Айта кетейік, физикадан халықаралық олимпиада 1967 жылдан бері өткізіледі және бұл сайыс әлемдегі ең беделді пәндік жарыстардың бірі саналады. Ал ұлттық құрама IPhO олимпиадасына 1997 жыл­дан бері тұрақты қатысып келеді.

Математика мықтылары

Аустралияда өткен IMO-2025 халықаралық математика олимпиадасында Қазақстан құрамасының қоржыны тағы алты медальмен толықты. Жыл сайын дәстүрлі түрде ұйымдастырылатын бұл білім бәйгесіне биыл 112 елден 650-ге жуық үздік жас математик қатысып, бақ сы­наған. Ел намысын қор­ғаған оқушыларымыз төрт күміс, екі қола медальға қол жеткізіп, үздіктер қатарынан көрінді. Бұл – үлкен жетістік.

Халықаралық IMO олимпиадасына Қазақстан құрама командасы алғаш рет 1993 жылы қатысты. Содан бері жүлде қоржынымыз 16 алтын, 55 күміс, 81 қола медальмен толықты. Ал биыл­ғы нәтижеге келер болсақ, Алматы қаласындағы «Hai­ley­bury Almaty» мек­те­бі­нің оқушылары 11-сынып оқу­шысы Амирлан Аман­жо­лов пен 12-сынып оқушысы Мирон Юркевич, Астана қаласындағы «Spec­trum International School» мектебінің 11-сынып оқу­шысы Марғұлан Шарел, Алматы қаласындағы РФММ мектебінің 11-сынып оқушысы Амир Сахипов күміс медальға ие болса, Ақтөбе облысындағы «Білім-инновация» лицей-интернатының 11-сынып оқушысы Ерқанат Кеншілік пен Алматы қаласындағы Nurorda мектебінің 10-сынып оқушысы Ерасыл Алтынбек қола медальға қол жеткізді. Оларға жетекшілік еткен — PhD докторы Асылбек Исахов пен халықаралық олим­пиа­далардың жеңімпазы Қанат Сатылханов.

Үздік биологтер

Қазақстан құрамасы Фи­лип­пинде өткен IBO-2025 Халықаралық биология олимпиадасында тәуір нәтиже көр­сетіп, төрт қола медальды қанжығаға байлады.

Осындай үздік нәтиже көр­сеткен Қазақстан коман­дасының құрамында Пав­лодар облысындағы «Білім-инновация» лицей-интер­натының 10-сынып оқушысы Ерсұлтан Қайыркен, Өске­мен қаласындағы Назарбаев зияткерлік мектебінің 11-сынып оқушысы Батыр Ер­жанұлы, Астана қаласын­дағы Назарбаев зияткерлік мектебінің 12-сынып оқушысы Айғаным Балташева, Ал­маты қаласындағы «Білім-инновация» лицей-интер­натының 8-сынып оқушысы Алихан Ашырханов бар. Команданың ғылыми жетек­шілері – отандық ғылымды белсенді дамытып жүрген жас биолог-ғалымдар Лейла Асқарова мен Ильяс Сакимов.

Айта кетейік, биыл бұл білім додасына 80 елден 320-дан астам дарынды жас қатысты. Жалпы, IBO-2025 олимпиа­дасы екі кезеңнен тұрады. Алғашқы теориялық бөлімде оқушылар молекулалық және жасушалық биология, генетика, экология, эволюция және биожүйелеу бойынша күрделі есептерді шешеді. Ал практикалық кезеңде зерт­ханалық жұмыстармен айналысып, биологиялық үдеріс­терді талдайды.

Ұлттық құрама 1994 жылдан бері IBO олимпиадасына қатысып келеді. Осы уақыт ішінде озат оқушыларымыз 2 алтын, 18 күміс және 56 қола медаль, сондай-ақ 12 құрмет грамотасын жеңіп алды. Еске сала кетейік, 2024 жылы бұл олимпиада Астана қаласында ұйымдастырылды.

Дарынды оқушыларды, олардың ұстаздары мен ата-ана­ларын осы жарқын жеңіс­пен құттықтаймыз!