2025 жылғы 19 мамырдан бері Газаға азық-түлік, дәрі-дәрмек және басқа да алғашқы қажеттіліктегі заттарды тиеген 2013 жүк көлігі жеткізілген. Алайда олардың тек 260-ы ғана нақты алушыларға жеткен. Қалған 1753 жүк көлігі Палестина аумағында не күшпен басып алынған, не ұрланған. Ерекше күрделі жағдай 31 мамырда орын алған – сол күні 1695 тонна гуманитарлық көмекті алып келе жатқан 90 жүк көлігі тоналған.
БҰҰ-ның жобалық қызметтер басқармасының (UNOPS) өкілдері көмектің ұрлануы екі түрлі жолмен жүретінін айтады: кейде аш адамдар тауарларды тікелей керуеннен бейбіт жолмен тартып алады, ал кейде қарулы топтар күшпен тартып алады.
Сарапшылардың айтуынша, бұл ауқымды ұрлықтар Газа секторындағы аса ауыр гуманитарлық дағдарысты одан әрі ушықтырып отыр. Азық-түлік пен дәрі-дәрмек тапшылығы бейбіт тұрғындардың өміріне тікелей қауіп төндіруде. Халықаралық ұйымдар жалғыз шешім – көмекті қауіпсіз және тұрақты жеткізу жолдарын жолға қою деп санайды.
Алайда жағдайды қиындатып тұрғаны – Израиль мен батыс сарапшыларының мәліметінше, кейбір қарулы топтар гуманитарлық жүктің жүйелі түрде тоналуына қатысып, оны қара базарда сатады және сол арқылы өз қызметін қаржыландырады.
Еске салайық, Израиль әскері Газаның орталық бөлігіндегі тұрғындарды оңтүстікке эвакуациялануға шақырды, себебі Дейр-эль-Балах қаласында әскери операцияларды кеңейту жоспарланған. БҰҰ-ның гуманитарлық мәселелерді үйлестіру басқармасы бұл әрекетті «жаппай қуғындауға бұйрық» және «соғыс шарпыған аймақтағы гуманитарлық күш-жігерге соққы» деп қатаң сынға алды. Ұйым мәліметінше, эвакуация туралы мәлімдеме жасалған сәтте бұл аймақта 50–80 мың адам болған, олардың қатарында шатырларда өмір сүріп жатқан мыңдаған босқын да бар. Қазірдің өзінде мыңнан астам отбасы қақтығыс аймағынан кетуге мәжбүр болған.
