Медицина • 20 Тамыз, 2025

Бестеректегі жол апатынан зардап шеккен екі бала Астанаға жеткізіледі

1 мин

оқу үшін

Абай облысының Үржар ауданы Бестерек ауылындағы жол-көлік оқиғасынан зардап шеккен екі баланы Астана қаласындағы №2 Көп бейінді қалалық балалар ауруханасына емдеуге жатқызу туралы шешім қабылданған. Бұл туралы Денсаулық сақтау министрлігі хабарлады, деп жазады Egemen.kz.

Дана МЫРЗАҚАДІР

Бестеректегі жол апатынан зардап шеккен екі бала Астанаға жеткізіледі

Фото: ДСМ

Пациенттер Ұлттық шұғыл медицинаны үйлестіру орталығының (ҰШМҮО) санитариялық авиация бортымен Астанаға жеткізіледі.

Бортта балаларға ҰШМҮО реаниматологы Е. Шақан, Астана қаласының №2 Көп бейінді қалалық балалар ауруханасының травматологы Н. Жакипов және Ұлттық нейрохирургия орталығының (ҰНХО) нейрохирургы С. Сейтбеков дәрігерлер бригадасы құрамы медициналық көмек көрсетеді.

Оқиға орнында бірден аудандық ауруханада облыстық және республикалық деңгейдегі мамандардан құрылған мультитәртіптік бригада толық диагностикалық зерттеу жүргізіп, зардап шеккендердің жағдайын бағалады және жедел емдеу жоспарын жасаған.

«Бала жағдайының тұрақсыздығы ескеріле отырып, пациенттердің бірі – тоғыз жасар қыз бала Абай облысының бас штаттан тыс анестезиолог-реаниматологы Д. Каримовтың бақылауымен жағдайы тұрақталғанға дейін стационарда қалдырылды», делінген министрлік хабарламасында.

Айта кетейік, 19 тамыз күні Абай облысының Үржар ауданында 55 жастағы жүргізуші көлік тізгініне ие бола алмай 3 баланы опат еткен еді. Қалған 3 бала ауруханаға жеткізілген болатын.