Сурет: gov.kz
«Жастар практикасымен»жұмысқа орналасқандардың көшін еліміздің оңтүстігіндегі өңірлер бастап тұр. Нақтыласақ, Түркістан облысында – 2,1 мың, Жамбылда – 802 адам, Қызылорда облысында – 775, Шымкент қаласында 665 адам тіркелген. Ал ауыл тұрғындарының үлесі – 5 мың адам, пайызбен есептегенде 58,1%-ға жеткен.
Бағдарлама шарты туралы аз-кем айта кетсек, мүмкіндікті 35 жасқа дейінгі ел азаматтары пайдалана алады. Ол үшін үміткердің мамандығы бойынша білімі болуға тиіс. Бұл бағдарлама оқуын бітіріп, жұмыс таппай жүрген түлектердің өз мамандығы бойынша тәжірибе жиюына таптырмас мүмкіндік. Себебі еңбек нарығында жұмыс берушілердің таңдауы көбіне жас маманға емес, өз саласында ысылған, дайын қызметкерге түседі.
Бағдарлама арқылы жұмысқа орналасқандардың арасында ең көп сұранысқа ие мамандық – мейіргер. Оған 654 адам жұмысқа тартылған. Сосын заңгер – 367, бастауыш сынып мұғалімі – 309, тәрбиеші – 292, шет тілі мұғалімі – 282 адам. «Жастар практикасына» қатысқан отандастардың ішінде Көкшетау қаласының тұрғыны Бәтима Жасұланова бар.
«Былтыр Кенжеғали Сағадиев атындағы Халықаралық бизнес университетін «Өнеркәсіптегі халықаралық бизнес-логистикасы» мамандығы бойынша бітірдім. Аз уақыт Астанадағы бір ұйымда жұмыс істеп, қысқарту кезінде жұмыстан босап қалдым. «Мансап» орталығына хабарласып, жұмыссыз ретінде тіркелдім. Онда маған «Жастар практикасына» қатысуды ұсынды. Қазір Ақмола облысының жолаушылар көлігі және автомобиль жолдары басқармасында көлік инженері болып жұмыс істеймін», дейді Бәтима Жасұланова.
Бүгінде бағдарламаның мүмкіндігін пайдаланғандардың орташа жалақысы республика бойынша 109,5 мың теңгені құрапты. «Жастар практикасын» Еңбек мобильділігі орталығы «Азаматтарға арналған үкімет» мемлекеттік корпорациясы арқылы жұмысшының ай сайынғы жалақысын төлеу арқылы қаржыландырады. Мемлекет ұсынған мүмкіндікті пайдаланып, еңбек нарығында өз жолын тапқан жастар көп.
