Оған мұндай жетістікке жету бірден оңай болған жоқ. Жыл басында Италияда АҚШ, Латын Америкасы, Франция және басқа да елдердің вокалистерін жинаған ауқымды тыңдалым өткен еді. Соңғы мәреде онымен бірге италиялық үміткер қалды. Алайда маңызды шешімді комиссия төрағасы, маэстро, атақты Мирелла Френидің жары Леоне Маджера қабылдады. Ол біздің Әлиханға негізгі партияны сеніп тапсырып, отандасымыздың бірегей вокалдық талантын ерекше бағалады.
Операның қойылымы алдағы қарашада басталады. Одан кейін дебюттік спектакльдер желтоқсанда өтеді: екі көрсетілім Луккада ұсынылса, тағы екеуі келесі жылы қаңтарда Феррарада таныстырылады. Рөлге дайындық жұмысы әлдеқашан басталған. Алдымен дайындық Миланда өтіп, одан кейін Бакуде жалғасты. Бұл жаққа әнші «Астана операның» театр маусымы аяқталысымен аттанған болатын.
«Кез келген дебютке дайындық – үлкен жауапкершілік. Астанадағы және Миландағы профессорларымның арқасында Италиядағы өзімнің екінші дебютіме мұқият дайындалып жатырмын. Дж.Россинидің «Күлбике» операсындағы Дон Рамиро ханзаданың партиясы – күрделі вокалдық материал. Онда виртуоз колоратуралар мен жоғары ноталар көп кездеседі. Қазір театрдағы жұмысымнан бөлек, барлық бос уақытымды осыған арнап отырмын. Бұл опера тыңғылықты еңбекті талап ететін және тілдің көптеген күрделі идиомалық айналымы кездесетін нағыз италиялық туынды», деді ол.
Дарынды жастың өнердегі аяқ алысы ерекше қуантады. Айталық, көктемде Санкт-Петербордағы «Классика на Дворцовой» фестивалінің тарихына еніп, осы айтулы сахнада өнер көрсеткен тұңғыш қазақ әншісі атанды. Сондай-ақ былтыр Флоренциядағы «Maggio Musicale» театрында және Пезародағы Дж.Россини академиясында тағылымдамадан өткен. Сол кезде ол әйгілі Россини фестивалінде «Реймске саяхат» операсында дебют жасады. Одан кейін оған Румыниядан шақырту келді. Сол жақта әнші буффа жанрының әлемдік шебері, италиялық бас Бруно де Симонемен бірге «Севильдік шаштараз» операсындағы граф Альмавиваның партиясын орындады.
