Соның айғағы ретінде биыл «Мариям» шаруа қожалығы алғаш рет қауын егіп отыр. Жалпы, 280 гектар жерді игерген қожалық еңбеккерлері 2 гектарға төрт түрлі қауын отырғызып, гектарына 40 тоннадан өнім алды.
«Қауын еліміздің оңтүстігінде көп өсіріледі. Биыл біз де тәжірибе ретінде егіп көрдік. Еңбегіміз ақталып, өнім өте сапалы шықты. Тәттілігіне өзге кәсіпкерлер де таңғалды. Өнімді негізінен Алматыдағы ірі базарларға жөнелтудеміз. Ендігі жылы қауын алқабын ұлғайтуды жоспарлап отырмыз», дейді қожалық басшысы Бекзат Заманбеков.
Қожалық бұдан бөлек 220 гектарға жүгері, 20 гектарға бақша дақылдарын, 14 гектарға пияз, 30 гектарға жоңышқа еккен. Алдағы уақытта егістік аумағын 500 гектарға дейін кеңейтуді жоспарлап отыр. Сонымен қатар шаруашылық иесі мемлекет тарапынан инфрақұрылымды дамытуға субсидия алу үшін құжаттар рәсімдеп жатқанын айтты. Бұған дейін «Кеңдала-2» бағдарламасы арқылы 40 млн теңге несие алып, ісін ілгерілеткен.
Шаруалардың құт мекеніне айналған Шеңгелдіде пияз егумен айналысатын «Бауыр» шаруа қожалығы биыл 70 гектар аумақты игерген. Қазір 20 гектардан 1 600 тонна өнім алды.
Жалпы, Шеңгелдіде 11 769 гектар жер игерілді. 13 шаруа қожалығы 2 000 гектар аумақта су үнемдеу технологияларын қолдануда (900 гектарын – жаңбырлатып, 1 100 гектарын – тамшылатып суару). Биылғы науқан кезінде 315 тонна бидай, 3 127 тонна арпа, 1 750 тонна картоп, 1 950 тонна пияз, 4 430 тонна бақша дақылы және 21 247 тонна мал азығын жинау көзделген.
Күзгі дала жұмысына 119 тонна арзандатылған дизель отыны бөлініп, шаруалармен келісімшарт жасалғанын атап өткен жөн.
Алматы облысы
