«Amanat» партиясының «Халықпен бірге!» сайлауалды бағдарламасы аясында бой көтерген нысан Ата заңның 30 жылдығы мерекесі қарсаңында пайдалануға берілді. Құрылысына мемлекетке қайтарылған заңсыз активтерден 263 млн теңге бөлінген жаңа нысанның ашылуына тұрғындар тайлы-таяғы қалмай жиылды.
Аудан әкімі Қайыржан Жақсымбетов жалпы аумағы 70 сотық жерге салынған 264 шаршы метрді құрайтын жаңа ғимарат бір мезетте 40 адамға дейін қабылдауға мүмкіндік беретіндігін атап өтті.
«Фельдшерлік-акушерлік пункт – ауыл тұрғындары үшін қолжетімді әрі сапалы медициналық көмектің кепілі. Ғимарат заманауи жабдықтармен толық қамтылған. Мұнда алғашқы қабылдау, жүкті әйелдерге арналған арнайы кабинет, егу, процедуралық бөлмелер қарастырылған. Ауыз су құбыры, кәріз жүйелері тартылған. Алдағы уақытта ауданда осындай тағы екі медициналық пункт ашу жоспарланып отыр», – деді аудан басшысы.
«Amanat» партиясының өкілдері жобаны ауылдағы денсаулық сақтау сапасын артыруға бағытталған маңызды қадам деп бағалап отыр. Өйткені енді тұрғындар дәрігерге қаралу үшін аудан орталығына сабылмайды.
«Талдау тапсыру үшін енді аудан орталығына барудың қажеті жоқ. Тіпті қажет болған жағдайда қаладағы ауруханаларға жолдама беріледі. Бұл – партияның ауылдарда медициналық көмекті жақындату бағытында жүргізіп келе жатқан жүйелі жұмысының нәтижесі», – деді «Amanat» партиясы Іле аудандық филиалының төрағасы Алмасбек Сатыбаев.
Жобаның тағы бір ерекшелігі – оның қаржыландыру көзі. Жаңа медициналық пункттің құрылысына мемлекетке қайтарылған заңсыз активтерден бөлінген қаражат жұмсалды. Іле ауданының прокуроры Бауыржан Төлендиновтің айтуынша, мұндай бастама – заң үстемдігі мен әлеуметтік әділеттіліктің нақты көрінісі.
«Өңірде заңсыз шығарылған активтерді мемлекетке қайтару бағытында жүйелі жұмыс жүргізіліп жатыр. Сол қаражат есебінен халыққа қажетті әлеуметтік нысандар салынбақшы. Бүгін қолданысқа берілген медициналық пункт – соның нақты айғағы. Қазірде облыста осындай 22 нысанның құрылысы жүріп жатыр», деді ол.
Айта кетейік, биыл Алматы облысында «Amanat» партиясының сайлауалды бағдарламасы аясында 15 дәрігерлік амбулатория, 12 фельдшерлік-акушерлік пункт, 11 медициналық пункт салу жоспарланған.
Сонымен қатар ауылдарға жас мамандарды тарту үшін де нақты іс-шаралар қолға алынған. Партияның бастамасымен аса тапшы мамандық иелеріне 8,5 млн теңге көлемінде бір реттік төлем қарастырылған. Тек шарт бойынша дәрігерлер кемінде бес жыл ауылда қызмет етуге міндетті.
Алматы облысы
