Фото: Ашық дереккөз
Депутат Бекбол Орынбасаровтың айтуынша, Хаттама 2023 жылғы 25 желтоқсанда Санкт-Петербургте ЕАЭО мемлекеттері басшыларының қол қоюымен бекітілген. Құжаттың негізгі мақсаты – сыртқы электронды сауданы құқықтық тұрғыдан реттеу. Бұл бағыт соңғы жылдары тұрақты өсім көрсетіп отыр: тек 2024 жылдың өзінде Қазақстандағы электронды сауда көлемі 3,2 трлн теңгеге жеткен.
Хаттама ЕАЭО-ға мүше барлық мемлекеттер – Ресей, Беларусь, Қырғызстан және Армения тарапынан ратификацияланды.
Құжатта электрондық сауда тауарларын жеткізуді жүзеге асыратын пошта операторы — «электронды сауда операторы» ұғымын енгізу қарастырылған. Сондай-ақ кедендік декларацияның жаңа түрін — электрондық сауда декларациясын енгізе отырып, электронды сауда тауарларының барлық көлемін кедендік декларациялау көзделген.
Қазіргі ережелер бойынша, шетелден жеке тұлғаларға келетін тауарлар тек 200 еуро немесе 31 кг-нан асқан жағдайда ғана декларацияланады. Мұндайда алушы өзі құжат рәсімдеп, 15% кедендік төлем төлейді. Ал белгіленген шектен төмен тауарлар есепке алынбайды. Жаңа талаптарға сәйкес, енді барлық тауарлар декларацияланады. Бұл статистиканы нақты жүргізуге мүмкіндік береді. Декларацияны оператор да, тауар алушы да толтыра алады.
