«Отырыстың күн тәртібіне қойылып отырған мәселе – Қостанай облысындағы өңірлік ғылымды дамытуды шикізат өңдеу мен аймақ экономикасының тұрақты дамуын қамтамасыз ету мәселелерімен үйлестіре отырып қарау. Бұл түйткілдер күн тәртібіне кездейсоқ қойылған жоқ. Себебі олар қазір ең өзекті мәселелердің біріне айналып отыр. Өңірде өңдеу саласында қосымша құн қалыптастырудың пайдаланылмаған зор әлеуеті бар. Бұл өндіріс тиімділігін одан әрі арттыруға және жүйелі негізде импортты алмастыру мәселесін шешуге мүмкіндік береді. Мемлекет басшысы осы мәселеге ерекше назар аударып, үш жыл ішінде агроөнеркәсіп кешеніндегі (АӨК) өңделген өнім үлесін 70%-ға дейін арттыру міндетін қойды. Қостанай облысы – ауыл шаруашылығы жер көлемі 10 млн гектардан асатын, еліміздегі ең ірі аграрлық өңірлердің бірі және елеулі индустриялық әлеуетке ие. Өңірдің орнықты дамуы ғылыми тұрғыдан негізделген шешімдерді, климаттық тәуекелдерге бейімделуді, ресурстарды ұтымды пайдалануды, эмиссияны азайтуды және экологиялық технологияларды енгізуді қажет етеді», деді Президент жанындағы ҰҒА президенті Ақылбек Күрішбаев.
Академия өңірді дамытуға бағытталған бірқатар шешімді ұсынды. Мәселен, өңірде ғылыми-инновациялық қор құрылып, облыстың нақты қажетіне негізделген ғылыми зерттеулерді мақсатты қаржыландыру тетігі енгізіледі. Осы орайда басым ғылыми бағыттарды облыс әкімдігі академиямен бірлесе белгілейді. Осылайша, өндірістік циклдің барлық кезеңі – жаңа сорттар мен тұқымдарды шығарудан бастап, терең өңдеудің кешенді технологиялары мен тиімді басқару шешімдерін енгізуге дейін ғылыми-технологиялық тұрғыдан сүйемелденеді.
Облыс әкімі Құмар Ақсақаловтың айтуынша, АӨК саласында келесі жылдан бастап 12 жаңа сүт-тауар фермасы пайдалануға беріледі. Өңір басшылығы өнімді қайта өңдеуге, ішкі нарыққа шығаруға, жаңа жұмыс орындарын құруға екпін қоймақ.
Көшпелі отырыс аясында ғылыми-инновациялық көрме ұйымдастырылып, шетелден, орталықтан келген және жергілікті ғалымдардың, бизнес пен мемлекеттік қызмет өкілдерінің қатысуымен форсайт-сессия өтті. Қатысушылар ғылыми қауымдастық пен өнеркәсіп арасындағы өзара іс-қимылдың мүмкіндіктерін талқылады.
Қостанай облысы
